اگست 2026 دنیا کا مشترکہ طور پر گرم ترین مہینہ قرار دے دیا گیا۔ یورپی یونین کی موسمیاتی نگرانی سروس کوپرنیکس (Copernicus Climate Change Service) کے مطابق اگست کے دوران عالمی اوسط سطحی درجہ حرارت 16.96 ڈگری سینٹی گریڈ ریکارڈ کیا گیا، جو 1991 سے 2020 کی اوسط کے مقابلے میں 0.85 ڈگری زیادہ ہے۔
کوپرنیکس کے مطابق اگست 2026 عالمی سطح پر اب تک کا گرم ترین اگست تھا اور تمام کیلنڈر مہینوں میں بھی جولائی 2023 کے ساتھ مشترکہ طور پر گرم ترین مہینہ رہا۔ عالمی درجہ حرارت صنعتی دور سے پہلے کے 1850-1900 کے اوسط درجہ حرارت سے 1.65 ڈگری سینٹی گریڈ زیادہ رہا۔
ماہرین کے مطابق اس غیر معمولی گرمی کے پیچھے موسمیاتی تبدیلی اور مضبوط ہوتے ال نینو (El Niño) سمیت متعدد عوامل کارفرما ہیں۔ اگست میں غیر قطبی سمندروں کی اوسط سطحی درجہ حرارت بھی ریکارڈ بلند رہا، جو عالمی سطح پر بڑھتی گرمی کی شدت کو ظاہر کرتا ہے۔
رپورٹ کے مطابق مغربی یورپ نے 2026 میں ریکارڈ گرم ترین موسم گرما دیکھا، جبکہ کئی علاقوں میں شدید گرمی کی لہروں، خشک سالی اور جنگلات میں آگ کے واقعات نے صورتحال کو مزید سنگین بنا دیا۔
کوپرنیکس کی جانب سے واضح کیا گیا ہے کہ ایک ماہ کا درجہ حرارت 1.5 ڈگری کی حد سے اوپر جانا پیرس معاہدے کی طویل مدتی حد کے باضابطہ طور پر ٹوٹنے کے مترادف نہیں، تاہم یہ عالمی حدت میں اضافے اور موسمیاتی شدت کی تشویشناک علامت ضرور ہے۔
