پولیو سے متعلق غلط معلومات کے ادراک کیلئے ڈاکٹروں کی ٹاسک فورس تشکیل دینے کافیصلہ

(جنرل رپورٹر)
والدین کے خدشات دور کرنے اور ویکسین پر اعتماد مزید مضبوط بنانے کے لیے ڈاکٹروں کی ٹاسک فورس تشکیل دینے کا فیصلہ کیا گیا ہے۔ یہ فیصلہ سروسز ہسپتال میں پاکستان پیڈیاٹرک ایسوسی ایشن کے نمائندوں اور سینئر ڈاکٹروں کے ساتھ منعقدہ ایک ورکشاپ میں کیا گیا۔ ورکشاپ کا مقصد پولیو کے خاتمے کی کوششوں کو مزید تیز کرنے اور طبی ماہرین کو پولیو ویکسین سے متعلق غلط معلومات اور افواہوں کے موثر تدارک کے لیے متحرک کرنا تھا۔ وزیراعلیٰ پنجاب کی فوکل پرسن برائے پولیو محترمہ عظمی کاردار نے کہا کہ پولیو سے متعلق افواہوں اور غلط معلومات کے تدارک کے لیے صوبہ بھر میں ڈاکٹروں کی ٹاسک فورس تشکیل دی جائے گی۔ انہوں نے کہا کہ ٹاسک فورس کو سینئر ڈاکٹروں اور طبی ماہرین کی معاونت حاصل ہوگی، جو والدین کے خدشات دور کرنے اور پولیو ویکسین سے متعلق مستند معلومات فراہم کرنے میں اہم کردار ادا کریں گے۔ عظمی کاردار نے کہا کہ ڈاکٹرز اور طبی ماہرین والدین کے لیے قابل اعتماد ذرائع ہیں اور ان کی معاونت سے ویکسین سے متعلق عام غلط فہمیوں اور افواہوں کا موثر جواب دیا جاسکتا ہے۔ انہوں نے کہا کہ طبی ماہرین کو شواہد پر مبنی پیغامات اور عام سوالات و خدشات کے سادہ اور واضح جوابات فراہم کیے جائیں گے تاکہ وہ والدین کے ساتھ براہ راست رابطے اور ڈیجیٹل پلیٹ فارمز کے ذریعے ویکسین پر اعتماد کو مزید مضبوط بنا سکیں۔ انہوں نے کہا کہ پولیو کے خاتمے کے لیے معاشرے کے بااعتماد طبقات کو انسداد پولیو پروگرام کے ساتھ مل کر کام کرنا ہوگا جبکہ ڈاکٹرز، طبی ماہرین اور پیڈیاٹریشنز والدین تک درست معلومات پہنچانے میں خصوصی کردار ادا کرسکتے ہیں۔ انسداد پولیو پروگرام کے سربراہ خالد پرویز نے کہا کہ پنجاب نے پولیو کے خلاف نمایاں پیشرفت کی ہے، تاہم مثبت ماحولیاتی نمونوں کی موجودگی اس بات کا تقاضا کرتی ہے کہ پروگرام کی کوششوں میں کسی قسم کی کمی نہ آنے دی جائے۔ انہوں نے کہا کہ پولیو کے خاتمے کے لیے سینئر ڈاکٹروں اور طبی ماہرین کی معاونت انتہائی اہم ہے۔ خالد پرویز نے کہا کہ پنجاب کا فوری مقصد پولیو وائرس کی منتقلی پر قابو پانے سے آگے بڑھ کر اس کی مسلسل منتقلی کو مکمل طور پر روکنا ہے۔ انہوں نے کہا کہ ہر انسداد پولیو مہم کے دوران رہ جانے والے بچوں کی نشاندہی اور انہیں ویکسین پلانا اولین ترجیح ہونی چاہیے۔ انہوں نے بتایا کہ انسداد پولیو مہم 21 ستمبر سے پنجاب کے 13 اضلاع میں شروع کی جا رہی ہے۔ لاہور میں مہم سات روز تک جاری رہے گی جبکہ باقی اضلاع میں مہم چار روزہ ہوگی۔ خالد پرویز نے کہا کہ مہم کے دوران مسڈ بچوں پر خصوصی توجہ دی جائے گی اور ایسے بچوں کی صرف گنتی کرنے کے بجائے ان کی پروفائلنگ، میپنگ اور فالواَپ یقینی بنایا جائے گا تاکہ کوئی بچہ ویکسین سے محروم نہ رہے۔ انہوں نے کہا کہ موبائل اور مائیگرنٹ آبادی، دریائی علاقوں، دور دراز علاقوں اور صوبائی و ضلعی سرحدوں پر خصوصی توجہ ضروری ہے کیونکہ آبادی کی مسلسل نقل و حرکت ان بچوں کی شناخت، ٹریکنگ اور بار بار ویکسی نیشن کو مشکل بناتی ہے۔ ٹرانزٹ ویکسی نیشن، کمیونٹی انگیجمنٹ اور اضلاع کے درمیان رابطہ کاری کو مربوط انداز میں جاری رکھا جا رہا ہے۔ خالد پرویز نے کہا کہ لاہور اپنی بڑی آبادی، آبادی کی نقل و حرکت اور پروگرام کی پیچیدگی کے باعث مسلسل خصوصی توجہ کا متقاضی ہے۔ انہوں نے کہا کہ ڈاکٹرز، طبی ماہرین، کمیونٹی و مذہبی رہنمائوں، سماجی اثرانداز شخصیات اور فرنٹ لائن ورکرز کو مل کر ویکسین پر اعتماد مضبوط کرنا ہوگا۔ طبی ماہرین پولیو ویکسین کی حفاظت، افادیت اور ممکنہ سائیڈ ایفیکٹس سے متعلق والدین کے سوالات کے قابل اعتماد جوابات فراہم کرنے کے ساتھ ساتھ نئی افواہوں اور خدشات کی نشاندہی میں بھی پروگرام کی معاونت کر سکتے ہیں۔ورکشاپ میں پاکستان پیڈیاٹرک ایسوسی ایشن کے نمائندوں اور سینئر ڈاکٹروں نے شرکت کی اور پولیو ویکسین سے متعلق والدین کے خدشات، غلط معلومات اور افواہوں کے تدارک اور طبی ماہرین کے کردار پر تبادلہ خیال کیا۔ ورکشاپ کے شرکاء نے پولیو کے مکمل خاتمے کے لیے طبی ماہرین اور انسداد پولیو پروگرام کے درمیان تعاون کو مزید مضبوط بنانے کے عزم کا اظہار کیا تاکہ والدین تک مستند معلومات پہنچائی جا سکیں، ویکسین سے متعلق غلط فہمیوں کا بروقت ازالہ ہو اور ہر بچے کی ویکسی نیشن یقینی بنائی جا سکے۔