ٹرین حادثہ, سعد رفیق کا استعفیٰ دیں

لودھراں (نمائندہ خبریں) تحریک انصاف کے چیئرمین عمران خان نے دعویٰ کیاہے کہ انتخابات اسی سال ہوں گے، پاناما کیس سے فارغ ہونے کے بعد پارٹی ٹکٹوں کی تقسیم پرغورکیا جائے گا، آئی سی آئی جے کی ای میلز سے ثابت ہوتا ہے کہ لندن کے فلیٹس کی اصل مالکہ مریم نوازہیں، لودھراں میں ٹرین حادثہ مجرمانہ غفلت کا نتیجہ، ذمہ داروں کا تعین اور ریلوے کے وزیرکومستعفی ہونا چاہیے۔ لودھراں میں میڈیا سے گفتگو کرتے ہوئے عمران خان نے کہا کہ ٹرین حادثہ مجرمانہ غفلت کا نتیجہ ہے، یہ ظاہرکرتا ہے کہ کہیں نہ کہیں کسی نہ کسی نے کوتاہی کی ہے، جس کے ذمہ داروں کا تعین اور ریلوے کے وزیرکو مستعفی ہونا چاہیے، جب تک وزیر ریلوے استعفی نہیں دیں گے، معاملے کی شفاف تحقیقات نہیں ہوپائے گی، ریلوے کا وزیر ایک شخص کی ذاتی کرپشن کو بچانے کے لیے سپریم کورٹ میں بیٹھا ہوتا ہے تو پھر ریلوے کا یہی حال ہوگا۔ انہوں نے کہا کہ مقامی لوگوں کا خیال ہے کہ وزیراعظم نے لودھراں کے لیے ڈھائی ارب روپے کے ترقیاتی پیکیج کا اعلان کررکھا تھا، اس میں سے تھوڑی رقم علاقے کے ریلوے پھاٹک پر لگادے۔ نیب کے قوانین سے متعلق عمران خان نے کہا کہ وزیراعظم کے خلاف بدعنوانی کے 12 اور ان کے بھائی شہبازشریف پرکرپشن کا ایک مقدمہ ہے لیکن نیب نے کارروائی نہیں کی، اس ادارے کی وجہ سے ملک میں کرپشن کم ہونے کے بجائے بڑھ رہی ہے، نیب بڑے ڈاکوں کو بچاتی اور چھوٹے چوروں کو پکڑتی ہے، چھوٹے چوروں کو پکڑنے سے ملک میں کرپشن ختم نہیں ہوگی۔ پاناما کیس سے متعلق چیئرمین تحریک انصاف نے کہا کہ آئی سی آئی جے کی ای میلزسے ثابت ہوتا ہے کہ لندن کے فلیٹس کی اصل مالکہ مریم نواز ہیں، اگر ہمارے شواہد مان لیے جاتے ہیں تو یہ ثابت ہوجاتا ہے کہ مریم نواز اپنے والد کی فرنٹ مین ہیں اور یہ ساری رقم نواز شریف کی ہے کیونکہ مریم نواز کے پاس تو دولت نہیں ہے اور نواز شریف نے کرپشن اور منی لانڈرنگ کرکے فلیٹ لیے ہیں۔ انہوں نے کہا کہ پاناما کیس سے فارغ ہونے کے بعد آئندہ عام انتخابات کے لیے پارٹی ٹکٹوں کی تقسیم پرغورکیا جائے گا کیونکہ انشا اللہ اسی برس انتخابات ہوں گے۔