اسلام آباد (ویب ڈیسک) وزیر مملکت برائے اطلاعات و نشریات مریم اورنگزیب نے تحریک انصاف کے ساہیوال میں ہونے والے جلسے کے حوالے سے کپتان سے طنزیہ استفسار کیا ہے کہ عمران خان صاحب! یہ جلسہ ہے یا کارنر میٹنگ؟ وزیر مملکت نے چیئرمین پی ٹی آئی کو ایک پیشکش بھی کر ڈالی، کہتی ہیں خان صاحب! اگر لوگ اکٹھے کرنے میں مشکل ہو رہی ہے تو خواجہ آصف اور خواجہ سعد رفیق کو آپ کی مدد کے لئے بھیج سکتے ہیں۔انہوں نے دعویٰ کیا کہ خان صاحب جلد مستقل ویزے پر باہر جانے والے ہیں۔ مریم اورنگزیب نے عمران خان کو مخاطب کرکے کہا کہ خان صاحب آپ شائد کے پی کے میں سرکاری نوکری بکنے کا ذکر کر ر ہے ہیں، آپ کو اپنے ملک کی قدر کب ہو گی؟ آپ کہتے ہیں کہ انگلستان نے مجھے کرکٹر بنایا، آپ کو یہ خدشہ ہے کہ اب کسی اور ملک کا ویزہ نہیں ملے گا۔مریم اورنگزیب نے سوال کئے کہ کے پی کا صحت اور تعلیم کا نظام کون ٹھیک کرے گا؟ کے پی کے احتساب کمیشن کو تالا لگایا گیا، وہاں کا انصاف کا نظام کون ٹھیک کرے گا؟
