لاہور (نیوزایجنسیاں) پاکستان سپر لیگ (پی ایس ایل) کے فائنل میچ کے لاہور میں انعقاد نے بین الاقوامی کھلاڑیوں کی پاکستان آمد کی راہ ہموار کر دی ہے اور متعدد ریسلرز کے پاکستان آنے کے بعد ورلڈ ریسلنگ انٹرٹینمنٹ (ڈبلیو ڈبلیو ای) کے ”کارلیٹو“ نے بھی پاکستان آنے کا اعلان کر دیا ہے۔تفصیلات کے مطابق پاکستانی ریسلر بادشاہ خان نے اپنے فیس بک پیج پر خبر دیتے ہوئے کہا کہ پرو ریسلنگ انٹرٹینمنٹ میں ڈبلیو ڈبلیو ای سٹار ’کارلیٹو“ بھی شرکت کریں گے جو لوگوں کے منہ پر تھوکنے کے باعث شہرت رکھتے ہیں۔ ہر وہ پاکستانی جو گزشتہ کافی عرصے سے ریسلنگ دیکھ رہا ہے، کارلیٹو سے بخوبی واقف ہو گا۔دنیا بھر کے ہزاروں لوگوں کی جانب سے ناپسند کئے جانے والے کارلیٹو کے چاہنے والوں کی تعداد بھی کچھ کم نہیں ہے۔ پرو ریسلنگ ایونٹ 17 مئی بروز بدھ کے ایم سی سٹی سپورٹس کمپلیکس کراچی میں ہو گا جبکہ 19 مئی کو لاہور اور 21 مئی کو اسلام آباد میں بھی ایونٹ کا انعقاد کیا جائے گا۔
