چور کے پاس رسیدیں نہیں, مریم اورنگزیب کا عمران خان بارے اہم انکشاف

اسلام آباد (بزنس رپورٹر) وزیر اطلاعات و نشریات و قومی ورثہ مریم اورنگزیب نے کہا ہے کہ وزیراعظم نواز شریف کے متبادل کسی نام پر نہ ہی غور ہو رہا ہے اور نہ ہی ہو سکتا ہے، نواز شریف وزیر اعظم ہیں اور انشاءاللہ رہیں گے، ، قیاس آرائیاں افواہیں پھیلانے والے ایک بار پھر جھوٹے ثابت ہوں گے، پوری قوم نے دیکھ لیا کہ کون چور ہے جو چور ہے وہی شور مچا رہا تھا‘ عمران خان کے پاس کاﺅنٹی کرکٹ کی سٹیٹمنٹ اور حاصل ہونے والی تنخواہ کی رسیدیں تک بھی موجود نہیں ہیں ۔ہفتہ کواپنے ایک بیان میں انہوں نے کہاکہ مسلم لیگ ن اور قوم وزیراعظم محمد نواز شریف کی حمایت میں متحد ہے ،مسلم لیگ ن کے قائد محمد نواز شریف ہی۔ انہوں نے کہا کہ وزیراعظم کے خلاف نہ کوئی مقدمہ ہے اور نہ ہی کوئی ثبوت ہے۔ انہوں نے کہا کہ وزیراعظم نواز شریف کی جرآت مندانہ قیادت میں پاکستان کی ترقی کا عظیم مقصد اور عوام کی خوشحالی کی منزل حاصل کرکے رہیں گے۔ نجی ٹی وی چینل سے گفتگو کرتے ہوئے انہوں نے کہا کہ آج پوری قوم نے یہ دیکھ لیا کہ کون چور ہے جو چور ہے وہی شور مچا رہا تھا۔ انہوں نے کہا کہ عمران خان کہتے ہیں کہ وہ کاﺅنٹی کھیل رہے تھے تو ان کے پاس اس کی بھی سٹیٹمنٹ موجود نہیں ہے، عمران خان جس وقت کی آپ بات کررہے ہیں جب آپ تنخواہ لیتے تھے اس کی رسید بھی آپ کے پاس موجود نہیں ہے۔ مریم اورنگزیب نے کہا کہ وزیر اوعظم نے تمام تر قانونی استثنیٰ کے باوجود خود کو احتساب کےلئے پیش کرکے نئی روایت قائم کی ہے، اب تمام پبلک آفس ہولڈر زکو احتساب سے گزرنا پڑے گا۔