اسلام آباد (آن لا ئن) حکومت نے پاناما کیس میں عدالت عظمی کا فیصلہ آنے سے قبل ہی جارحانہ سیاسی حکمت عملی اختیار کرنے کا فیصلہ کیا ہے جس کے تحت اپوزیشن کو آڑے ہاتھوں لیا جائے گا ساتھ ہی حکومتی وزراءکی جانب سے جے آئی ٹی میں شامل دو مقتدر اداروں کے نمائندوں پر بھی اعتراضات اٹھا دیئے گئے ہیں جبکہ چیئرمین پی ٹی آئی عمران خان کی زندگی کے ذاتی معاملات کو میڈیا اور عوام میں اچھالا جائے گا اس کے لئے ٹاسک وزیرا عظم نواز شریف نے اپنے اتحادی جے یو آئی ف کے سربراہ مولانا فضل الرحمن کو دے دیا ہے جو کہ سیتا وائٹ کیس کو دوبارہ اچھالیں گے اور ٹیریان کے معاملے پر عمران خان کو نااہل کروانے کے لئے سپریم کورٹ، الیکشن کمیشن اور قومی اسمبلی میں رٹ اور ریفرنس دائر کیا جائے گا ذرائع نے بتایا کہ وزیر اعظم نواز شریف کی زیر صدارت ہفتہ کو ایک اور مشاورتی سیاسی اجلاس ہوا جس میں سینئرو فاقی وزراءخواجہ آصف، شاہد خاقان عباسی، سعد رفیق اور احسن اقبال سمیت بعض آئینی اور قانونی ماہرین نے شرکت کی اور اس اجلاس میں بعض اہم فیصلے کئے گئے ہیں جس کے تحت اب حکومت جارحانہ رویہ اختیار کرے گی، اپوزیشن کو آڑے ہاتھوں لے گی جبکہ مشترکہ تحقیقاتی ٹیم کی تمام کارروائی کو بھی جانبدار قرار دیا گیا اسی لئے وزراءنے ہفتہ کی شام پریس کانفرنس میں جے آئی ٹی پر کڑی تنقید کی اور واضح کر دیا کہ انھیں انصاف ہوتا ہوا نظر نہیں آرہا، وزیرا عظم نواز شریف کا ذرائع کے مطابق کہنا تھا کہ وہ انصاف کے تقاضے پورے کرنے کے لئے جے آئی ٹی میں گئے مگر اب انھیں لگ رہا ہے کہ ان کے خاندان کا احتساب نہیں بلکہ انتقام لیا جا رہا ہے۔

لاہور (وقائع نگار) امیر جماعت اسلامی مولانا سراج الحق نے کہا ہے کہ پاناما لیکس حکمرانوں کیلئے خدا کی جانب سے بے آواز لاٹھی ہے ۔ کوئی بھی قانون اور احتساب سے بالاتر نہیں۔ نوازشریف ایک حاضری لگوا کر مظلوم بننے کی کوشش کر رہے ہیں ۔ چاہتے ہیں جے آئی ٹی کی رپورٹس لفافوں میں بند نہیں ہونی چاہئیںبلکہ عوام کے سامنے آنا چاہیے کیونکہ بند لفافوں سے شکوک و شبہات میں اضافہ ہوتا ہے۔ وزیر اعظم نے قومی اسمبلی میں تقریر کر کے جھوٹ بولا۔ ہم احتساب چاہتے ہیں مارشل لانہیں۔ ایوب خان کے دور میں بھی یہی جاگیردار تھے۔ لاہور میں میڈیا سے گفتگو کرتے ہوئے انکا کہنا تھا کہ پاناما لیکس کے فیصلے سے ملک میں بہت بڑی تبدیلی آئے گی، بعض لوگ چاہتے ہیں ایک بار پھر اسلام آباد میں چوہے اور بلی کا کھیل شروع ہو جائے مگر ہم چاہتے ہیں کہ ذمہ داروں کا احتساب کیا جائے۔ مخصوص لابی نے جمہوریت اور سیاست کو یرغمال بنا یا ہوا ہے۔خاتون وزیر اعظم بن سکتی ہے تو عدالت میں بھی حاضر ہو سکتی ہے۔کشمیریوں کو دہشتگرد قرار دینا مودی کی سازش ہے، قوم کا آزادی کیلئے جدوجہد کرنا دہشتگردی نہیں۔مولانا سراج الحق نے کہا کہ سپریم کورٹ کا فیصلہ کرپشن کے خلاف آئے گا ۔ 250خاندان روز اول سے پاکستان کو لوٹ رہے ہیں۔ اب نہیں تو کبھی نہیں، اگر اب احتساب نہ ہوا تو کبھی نہیں ہو گا۔ ہم کسی کی دشمنی میں نہیں بلکہ قوم کی محبت میں یہ بات کرتے ہیں۔کرپشن کی وجہ سے ہمارے ادارے تباہ ہو گئے۔ ان کا کہنا تھا کہ اگر پاناما میں ملوث افراد کا احتساب نہ ہواتو عوامی عدالت میں جائیں گے۔ جھوٹ اور سود کا نظام جب تک قائم ہے پاکستان ترقی نہیں کر سکتا۔ جماعت اسلامی نے فیصلہ کیا ہے کہ سودی نظام کیخلاف بھرپور مہم چلائیں گے۔ ووٹ کی طاقت سے مستقبل کو روشن بنایا جا سکتا ہے۔ امیر جماعت اسلامی نے کہا کہ پاناما لیکس میں 600سے زائد خاندانوں کے نام آئے مگر ابھی ایک خاندان کا ہی احتساب ہو رہا ہے ، ہم چاہتے ہیں کہ جن جن کے نام آئے سب کا احتساب ہو۔جے آئی ٹی پر مٹھائی نواز لیگ نے بانٹی، اب فیصلے بھی قبول کریں۔

راولپنڈی (بیورورپورٹ) چیف آف آرمی سٹاف جنرل قمر جاوید باجوہ نے کہا ہے کہ پوری دنیا جانتی ہے کہ کشمیریوں کو حق خودارادیت حاصل ہے برہان وانی سمیت دیگر شہداءکی قربانیاں رائیگاں نہیں جائیں گی۔ ہفتہ کے روز آئی ایس پی آر ترجمان میجر جنرل آصف غفور کی جانب سے ٹویٹ کیا گیا جس میں چیف آف آرمی سٹاف جنرل قمر جاوید باجوہ کی جانب سے بھارتی مظالم کے خلاف آواز اٹھانے پر شہید ہونے والے برہان وانی کی برسی کے موقع پر بیان دیتے ہوئے کہا کہ بھارتی ریاست کے جبر کے خلاف کشمیریوں کی قربانیاں انکی سوچ کی عکاس ہےں ایک دن ضرور آئے گا جب برہان وانی جیسے دیگر کشمیریوں کی قربانیاں رنگ لائیں گی۔ وزیراعظم محمد نواز شریف نے کہا ہے کہ اسلحہ کے زور پر قوموں کے جذبہ آزادی کو نہیں کچلا جا سکتا،برہان مظفر وانی تحریک آزادی کشمیر کے ایک نئے باب کا عنوان ہے،مقبوضہ کشمیر کی تحریک آزادی ہر طرح کی بیرونی مداخلت کے بغیر آگے بڑھ رہی ہے۔برہان وانی کی شہادت عالمی برادری اور اور قوتوں کو بھی متوجہ کر تی ہے کہ وہ مقبوضہ کشمیر میں انسانی حقوق کی سنگین خلاف ورزی سے آنکھیں نہیں چرا سکتے۔پاکستان اور کشمیریوں کا دل ایک ساتھ دھڑکتا ہے مصیبت کے ان لمحوں میں ہم انہیں تنہا نہیں چھوڑ سکتے، بھارت کو اقوام متحدہ کی قراردادوں کے احترام پر مجبور کرنا عالمی برادری کی اخلاقی ذمہ داری ہے ۔برہان وانی شہید کی برسی کے موقع پر اپنے پیغام میں وزیراعظم محمد نواز شریف نے کہا کہ برہان مظفر وانی تحریک آزادی کشمیر کے ایک نئے باب کا عنوان ہے۔ ایک سال پہلے اس جوانسال شہادت نے مقبوضہ کشمیر میں اپنے لہو سے جو چراغ روشن کیا، اس سے آج پوری وادی میں چراغاں ہے۔ انہوں نے کہا کہ اس شہادت نے اس حقیقت کو آخری درجے میں ثابت کر دیا ہے کہ کشمیر کا بچہ بچہ آزادی کے جذبے سے سرشار ہے اور بھارت کے غاصبانہ قبضے کو قبول کرنے کیلئے آمادہ نہیں۔انہوں نے کہا کہ اسلحہ کے زور پر قوموں کے جذبہ آزادی کو نہیں کچلا جا سکتا۔بھارت کو یہ حقیقت بھی سمجھ لینی چاہیے کہ تاریخ کو اندھا نہیں کیا جا سکتا۔انہوں نے کہا کہ مقبوضہ کشمیر کی یہ تحریک آزادی مقامی اور ہر طرح کی بیرونی مداخلت کے بغیر آگے بڑھ رہی ہے۔ پاک سرزمین پارٹی کے چیئرمین سید مصطفی کمال نے کشمیر کی آزادی کے جوان شہید برہان مظفر وانی کی پہلی برسی کے موقع پر انہیں زبردست خراج عقیدت پیش کیا ہے، اپنے بیان میں انہوں نے کہا ہے کہ جدوجہد آزادی کشمیر میں نئی روح پھونکنے والے برہان مظفر وانی نے اپنی زندگی آزادی کے کاز پر قربان کرکے کشمیریوں کے مقصد کو دنیا بھر میں ایک نئی پہچان دی اور کشمیری نوجوانوں کیلئے مشعل راہ بنے۔ پاکستان تحریک انصاف کی سینئر مرکزی رہنماءشیریں مزاری نے کہا ہے کہ برہان وانی کی شہادت نے کشمیریوں کی تحریک آزادی میں نئی روح پھونکی۔بھارت کے غاصبانہ قبضے کیخلاف کشمیریوں کی جدوجہد نسل در نسل جاری ہے۔ ڈاکٹر شیریں مزاری نے یہ بات سماجی رابطے کی سائیٹ پر برہان وانی کی قابض بھارتی افواج کے ہاتھوں شہادت پر انہیں خراج تحسین پیش کرتے ہوئے کہی۔ انہوں نے کہا کہ اہل کشمیر پر بھارتی جبروتسلط اور اقوام عالم کی مجرمانہ خاموشی تحریک حقِ خودارادیت دبائی نہیں جاسکتی۔اقوام متحدہ کشمیریوں کی تحریک خود ارادیت کو تسلیم کر چکی ہے۔ ڈاکٹر شیریں مزاری نے اس عزم کا اعادہ کیا کہ پاکستانی قوم اس تحریک حق خود ارادیت میں ہمیشہ اپنے کشمیری بھائیوں کے شانہ بشانہ کھڑی رہے گی۔ آل پاکستان مسلم لیگ کے سربراہ اور سابق صدر سید پرویز مشرف نے کہا ہے کہ برہان وانی وہ مجاہد ہے جو کشمیر کاز کے لئے بھارتی افواج سے لڑا۔برہان وانی نے کشمیری نوجوانوں کو ساتھ ملایا۔تحریک آزادی کشمیر میں دی گئی قربانیاں رائیگاں نہیں جائیں گی۔قومیں مقاصد کے لئے قربانیاں دیتی ہیںدعا ہے کشمیریوں کی قربانیوں کا مثبت نتیجہ نکلے۔ان خیالات کا اظہار انہوں نے ہفتہ کے روز نوجوان کشمیری حریت راہنما برہان وانی کے یوم شہادت کے حوالے سے کشمیریوں کے نام اپنے ایک ویڈیو پیغام میں کیا۔انہوں نے کہا کہ برہان وانی ایک عظیم مجاہد ہے جس نے کشمیر کاز کے لئے اپنی جان قربان کی۔ برہان وانی نے کشمیری نوجوانوں کوآزادی کی تحریک میں اپنے ساتھ ملایا۔برہان وانی ،ان کے بھائی مظفر وانی تحریک کے دیگر شہداءکی قربانیاں رائیگاں نہیں جائیں گی۔ اللہ ان شہداءکے درجات بلند کرے۔

لاہور (وقائع نگار) عوامی تحریک کے سربراہ ڈاکٹر محمد طاہرالقادری نے کہا ہے کہ پانامہ جے آئی ٹی میں اب تک جو کچھ ہوا ہے اس کی بنیاد پر میرا تجزیہ ہے کہ کچھ نہیں ہوگا اور میں اپنے اس تجزےے پر خوش نہیں ہوں ۔موجودہ کرپٹ حکمرانوں نے ہمارے 100 لوگوں کو گولیوں سے چھلنی کیا ہے ۔14 بے گناہوں کی لاشیں گرائی ہیں ۔یہ حکمران عوامی تحریک کے کارکنوں کے قاتل ہیں ،ہم سے بڑھ کر کس کو خوشی ہو گی کہ انہیں پھانسی لگے،یہ جیل جائیں ،یہ نا اہل ہوں مگر موجودہ حالات یہ ہیںکہ سب کچھ خریدا جا چکا ہے ۔ یہ سب ڈرامہ اور قوم کےساتھ بھونڈا مذاق ہو رہا ہے اس میں سے کچھ بھی نہیں نکلے گا ۔صرف ن لیگ کی الیکشن کمپیئن کا ایجنڈا اور اسکا منشور تیار ہو رہا ہے ۔جے آئی ٹی میں پیش ہونیوالے کرداروں کو دینے کےلئے طہارت کے سر ٹیفکیٹ تیار ہو چکے ہیں،جس جس کو بری کرنا ہو گا اس اس کو طہارت کا سر ٹیفکیٹ دے کر بری کر دیا جائے گا۔جو لوگ سٹیک ہولڈر نہیں ہیں انکے اوپر کیچڑ ڈال دیا جائیگا تا کہ باغبان بھی خوش رہے اور صیاد بھی شاد رہے۔ ان خیالات کا اظہار انہوں نے مصر روانگی کے موقع پر صحافیوں سے گفتگو کرتے ہوئے کیا۔ انہوں نے کہا کہ جے آئی ٹی فرشتوں کی طرح بندکمرے میں بیٹھی ہے نہ ان کی کسی نے شکل دیکھی ہے اور نہ وہ کسی سے بات کرتے ہیں۔ بند کمرے میں بیانات ہوتے ہیں جونہ کسی نے سنے ہیں نہ دیکھے ہیں۔مخالف فریق اندر جا سکتا ہے نہ کسی کے وکیل اور نہ ہی میڈیا والوں کو اندر جانے کی اجازت ہے۔جے آئی ٹی ممبران اپنی زبان سے کسی کو کچھ نہیں بتاتے،اللہ ہی بہتر جانتا ہے کہ پیش ہونے والا اندر آرام کرتا ہے یا اسکے لئے ڈنر سرو کیا جاتا ہے۔جے آئی ٹی میں پیش ہونیوالے تین چار گھنٹے کے بعد باہر آتے ہیںجو سکرپٹ پہلے سے لکھا ہوا ہوتا ہے اس کے مطابق بیان دیتے ہیں ،یکطرفہ گفتگو ہوتی ہے اور میڈیا والوں کو سوال کرنے کی اجازت بھی نہیں ملتی۔ یہ سب ایک ڈرامہ ہو رہا ہے اور پوری قوم کو بے وقوف بنایا جا رہا ہے۔ جن لوگوں نے کل کو آنے والے فیصلے کے خلاف چیخنا، اعتراض کرنا اور بولنا تھا انکا مکو ٹھپ دیا گیا ہے۔