اسلام آباد(خصوصی رپورٹ)پاناما کیس پر جے آئی ٹی نے وعدہ معاف گواہوں کی فہرست کو حتمی شکل دینا شروع کر دی ہے، جس سے شریف خاندان کے لئے مشکلات پیدا ہوسکتی ہیں۔ 5 شخصیات کو وعدہ معاف گواہ بنائے جانے کا امکان ہے، جبکہ سکیورٹیز اینڈ ایکس چینج کمیشن پاکستان کے چیئرمین ظفر الحق حجازی اور ادارے کے دیگر افسران مشترکہ تحقیقاتی ٹیم کے سامنے پیش ہوئے اور تمام مطلوبہ ریکارڈ فراہم کر دیا ہے۔ علاوہ ازیں چودھری شوگر ملز کے ریکارڈ میں ہیرا پھیری اور 2016ءمیں شوگر ملز کے حوالے سے جاری تحقیقات کے دوران ایس ای سی پی کی دستاویزات میں پرانی تاریخوں کے دستخط کے الزامات درست ثابت ہونے کے معاملے کی انکوائری رپورٹ پیر کو سپریم کورٹ میں پیش کئے جانے کا امکان ہے۔ ”امت“ کو انتہائی باوثوق ذرائع نے بتایا کہ پاناما کیس میں تحقیقات کرنے والی جے آئی ٹی نے اپنے کام کی تکمیل اور انکوائری کو مزید ٹھوس بنانے کے لئے وعدہ معاف گواہوںکے ناموں کی فہرست تیار کر لی ہے۔ اب اس میں سے ناموں کو حتمی شکل دی جارہی ہے۔ اس فہرست میں 5اہم ترین شخصیات شامل ہیں۔ جنہیں وعدہ معاف گواہ بنائے جانے کا امکان ہے۔ ان شخصیات کے نام فائنل کرانے میں شریف خاندان کے ایک انتہائی قریبی شخص کی معاونت بھی جے آئی ٹی کو حاصل ہے۔ جس کی وجہ سے ان ناموں کو فائنل کرنے میں قدرے آسانی ہو رہی ہے۔ ابتدا میں وعدہ معاف گواہوں کی فہرست میں 10 سے 15 افراد شامل تھے تاہم بعدازاں یہ فہرست 5 افراد تک محدود ہوگئی ہے۔ ان میں 2 شخصیات نے رضاکارانہ طور پر خود ہی وعدہ معاف گواہ بننے پر جبکہ 3 شخصیات نے اہم شخصیت اور جے آئی ٹی کی پیشکش کے بعد حامی بھری ہے۔ اس کے لئے انہوں نے اس معاملے میں وعدہ معاف گواہ بننے کے لئے کچھ شرائط بھی رکھی ہیں۔ جن کو جے آئی ٹی نے من و عن منظور کر لیا ہے۔ ان شرائط میں پہلی شرط ان کے نام میڈیا سمیت اداروں سے خفیہ رکھنا۔ دوسری شرط کسی بھی پریشانی کی صورت میں ان کی بیرون ملک منتقلی کے لئے فول پروف انتظامات اور تیسری شرط یہ کہ اس حوالے سے ان کی سکیورٹی پر کوئی سمجھوتہ نہیں کیا جائے گا۔ جس پر جے آئی ٹی نے ان شخصیات کو ہر طرح کی یقین دہانی کرائی ہے۔ ذرائع کا کہنا ہے کہ وعدہ معاف گواہ بننے والی شخصیات کے نام صیغہ راز میں رکھے جا رہے ہیں۔ جے آئی ٹی اجلاس میں ارکان کو وعدہ معاف گواہوں کی فہرست اور شخصیات کے تعاون کرنے بارے اعتماد میں لیا گیا۔ ان ناموں کو سپریم کورٹ میں پیش کرتے وقت بھی خفیہ رکھے جانے کا فیصلہ کیا گیا ہے۔ سپریم کورٹ اس بارے جو بھی فیصلہ کرے گی اس پر عمل کیا جائے گا۔ دوسری جانب جے آئی ٹی نے تحقیقات میں مزید وقت صرف ہونے کے بارے میں بھی تبادلہ خیال کیا ہے اور سپریم کورٹ سے بھی تحقیقات میں مزید پیشرفت اور معاملات کا نتیجہ نکالنے کے لئے مزید وقت کے حصول کے بارے میں درخواست کرنے پر جے آئی ٹی نے غور کیا ہے تاہم اس حوالے سے حتمی فیصلہ آئندہ 72 گھنٹوں میں کئے جانے کا امکان ہے۔ فیصلہ ہونے کی صورت میں درخواست سپریم کورٹ کے عمل درآمد بنچ کے روبرو پیش کر دی جائے گی اور یہ درخواست تحقیقات مکمل کرنے اور اس حوالے سے حتمی رپورٹ پیش کرنے سے قبل ہی دائر کی جائے گی۔ وزیراعظم نواز شریف اور وزیر اعلیٰ پنجاب شہباز شریف سے بعض اہم دستاویزات کی تصدیق کے لئے طلب کرنے کے معاملے پر بھی جے آئی ٹی کے اجلاس میں جائزہ لیا گیا تاہم اس بارے میں فیصلہ حسین نواز، حسن نواز اور مریم نواز کی پیشی کے بعد کیا جائے گا۔ جے آئی ٹی کے قریبی ذرائع کا کہنا ہے کہ اگر مریم نواز نے تمام تر اہم دستاویزات کی تصدیق کر دی تو پھر نواز شریف اور شہباز شریف کو طلب نہیں کیا جائے گا۔ جے آئی ٹی کی فائنل رپورٹ 10 جولائی کو سپریم کورٹ کے 3 رکنی خصوصی بنچ کے روبرو پیش کئے جانے کا امکان ہے۔

کراچی (خصوصی رپورٹ) سندھ میں نیب کو غیر مو¿ثر کرنے کیلئے پیپلزپارٹی کی جانب سے سندھ منسوخی ایکٹ 2017ءترمیمی بل آج منظوری کے لئے سندھ اسمبلی میں پیش کیا جائے گا۔ پیپلزپارٹی کی قیادت نے صوبے میں بدعنوانی سے متعلق مقدمات اور شکایات سے نمٹنے کیلئے سندھ احتساب کمیشن قائم کرنے کا بھی فیصلہ کیا ہے۔ اپوزیشن نے سندھ حکومت کے اقدام کے خلاف آج اسمبلی میں ”گو زرداری گو‘ گو کرپشن گو“ احتجاج کا اعلان کیا ہے۔ تفصیلات کے مطابق پیپلزپارٹی کی قیادت اور سندھ کابینہ کی منظوری کے بعد سندھ میں احتساب ایکٹ 1999ءکو منسوخ کرنے کا ترمیمی بل آج سندھ اسمبلی میں منظوری کے لئے پیش ہوگا۔ سندھ اسمبلی میں قائد حزب اختلاف اور ایم کیو ایم کے رہنما خواجہ اظہار الحسن کا کہنا ہے کہ سندھ حکومت اپنی کرپشن اور غلط کاموں کو چھپانے اور ان سے بچنے کیلئے من پسند قانون سازی کرنے جارہی ہے۔ پی ٹی آئی کے علی زیدی کا کہنا ہے کہ صوبائی اسمبلی میں ایسی قانون سازی نہیں کی جاسکتی جو وفاق یا آئین سے متصادم ہو اور مسلم لیگ فنکشنل کے سندھ اسمبلی میں پارلیمانی لیڈر نندرکمار کا کہنا ہے کہ سندھ میں نیب کو غیر مو¿ثر کرنے کے لئے پیپلزپارٹی کی کارروائی چوروں کو کھلی چھوٹ دینے کے مترادف ہے۔ سندھ حکومت کی یہ حرکت سندھ کو کرپشن کا پہلے سے بھی بڑا گڑھ بنا دے گی۔اسلام آباد (خصوصی رپورٹ)تحریک انصاف نے نیب آرڈیننس منسوخی کے سندھ حکومت کے فیصلے کے خلاف عدالت سے رجوع کیا ہے۔ پارٹی رہنما علی زیدی نے کہا کہ سندھ حکومت کابینہ کی جانب سے نیب آرڈیننس کی منسوخی پیپلزپارٹی کے اندر حکمرانی اور ترجیحات ظاہر کرتی ہے ، کوئی ابہام باقی نہیںکہ پیپلزپارٹی آئین اور قانون کو پامال کرکے سندھ حکومت چلانا چاہتی ہے، یہ اچانک سے سندھ حکومت پر کیسے انکشاف ہوا کہ 1999ءکا نیب آرڈیننس تو صوبائی سطح پر لاگوہی نہیں ہوتا؟ قانونی تقاضوں کو پورا کئے بغیر آرڈیننس کی منسوخی سندھ حکومت کی بدنیتی ظاہر کرتی ہے۔ انہوں نے مطالبہ کیا کہ سندھ حکومت نیا قانون پیش کرے یا موجودہ قانون میں مناسب ترمیم پیش لائے۔علی زیدی نے کہا سندھ حکومت کے ذریعے چیئرمین اور ڈائریکٹرز کی تعیناتی پیپلزپارٹی کے ارادے ظاہرکرتی ہے، لگتا ہے پیپلزپارٹی اینٹی کرپشن سیل کو مکمل خودمختاری سونپنے کو تیار نہیں، ماضی میں بھی اینٹی کرپشن سیل پبلک فنڈز کے ناجائز استعمال کے حوالے سے مشکوک رہا، سندھ حکومت کا یہ اقدام سندھ کو کرپشن کا پہلے سے بھی بڑاگڑھ بنادے گا۔ سندھ حکومت کا یہ اقدام آصف علی زرداری کو قومی دولت لوٹنے کے مزید مواقع فراہم کرے گا۔ سندھ کے عوام کو کرپشن کے انسداد کے لئے اس سنگین معاملے پر آواز بلند کرنا ہوگی۔

لاہور (خصوصی رپورٹ) شریف خاندان کی جے آئی ٹی میں بار بار پیشی‘ پانامہ کیس کو لے کر سوشل میڈیا پر بھی سیاسی درجہ حرارت عروج پر پہنچ گیا۔ پانامہ کیس بھی پاک بھارت میچ اور جنگ کی طرح سیاسی جماعتوں کے درمیان سوشل میڈیا پر لفظی جنگ کی صورت اختیار کرگیا۔ سیاسی جماعتوں اور خاص طور پر مسلم لیگ ن اور پاکستان تحریک انصاف کے درمیان سوشل میڈیا پر پانامہ کیس اور پانامہ لیکس کی تفتیش کے لئے قائم کی گئی جے آئی ٹی کے معاملہ پر ایک دوسرے کے خلاف سخت الفاظ‘ بے لگام تبصرے پوسٹیں‘ تحریریں‘ پوسٹ اور شیئرز کی جارہی ہیں۔ سوشل میڈیا اس وقت کی سب سے اہم ضرورتبن چکا ہے‘ کوئی بھی معاملہ ہو کوئی بھی خبر ہو میڈیا پر آئے یا نہ آئے سوشل میڈیا پر بحث مباحثہ پہلے ہی شروع ہوجاتا ہے۔ پانامہ لیکس کی تفتیش کے لئے قائم جے آئی ٹی کے سامنے مریم نواز کی پیشی کے معاملہ کو لے کر بحی بحث سوشل میڈیا زور پکڑ گئی ہے۔ پی ٹی آئی کے افراد سوشل یڈیا پر عمران خان کو خراج تحسین پیش کررہے ہیں کہ خان نے آخر کار ملک کے سب سے طاقتور خاندان کو تلاشی دینے پر مجبور کردیا اور یہ کام عمران خان کے علاوہ کوئی نہیں کرسکتا تھا۔ اسی طرح ن لیگ کی جانب سے پوسٹیں کی جارہی ہیں کہ شیر ہر دور میں ہی سرخرو ہوکر نکلا ہے اب بھی جے آئی ٹی اور کورٹ میں میاں نوازشریف بے قصور ثابت ہوں گے اور ن لیگ کو نشانہ بنانے والے ناکام ہوں گے۔

اسلام آباد (خصوصی رپورٹ)وفاقی وزیر ریلویز خواجہ سعدرفیق نے ریلوے مسافروں سے ٹکٹ گم ہونے کی صورت میں متبادل باڈپلیکیٹ ٹکٹ جاری کرنے کی منظوری دیدی ہے۔ اس نظام کے تحت آن لائن بکنگ کے ساتھ ساتھ ریلوے ریزرویشن دفاتر سے ہر ایڈوانس ریزرویشن پرمسافر کے موبائل فون پر ایک ایس ایم ایس جاری کیاجائیگا۔ ریزرویشن ٹکٹ گم ہونے کی صورت میں مسافر اپنے قومی شناختی کارڈ نمبر کے ساتھ ریلوے ہیلپ لائن کے خصوصی نمبر پر ایک ایس ایم ایس بھیجے گا اور جوابی ایس ایم ایس میں سے اپنی ٹرین، سفر کی تاریخ ،کوچ اور نشست کے نمبر کی تفصیلات موصول ہوجائیں گی۔ اس تصدیقی ایس ایم ایس کے ساتھ وہ اپنی نشست کی نشاندہی کرسکے گا اور کنڈکٹر گارڈ اپنے موبائل فون سے اس امر کی تصدیق کے بعد کہ گم شدہ ٹکٹ کا ریفند تو نہیں لیا جاچکا، دس فیصد جرمانے کے ساتھ ڈپلیکیٹ ٹکٹ موقع پر جاری کردے گا۔ وزیر ریلویز کو ڈائریکٹر جنرل انفارمین اینڈ ٹیکنالوجی فہدرحمان اور سی سی ایم نوید مبشر نے بتایا کہ گم شدہ ٹکٹ کا غلط اور غیرقانونی استعمال کرنے والے کے خلاف قانونی کارروائی ہوگی۔ وزیر ریلویز خواجہ سعد رفیق نے سوشل میڈیا سمیت دیگر ذرائع سے ملنے والی شکایات اور تجاویز کی روشنی میں ڈپلیکیٹ ٹکٹ کے اجراءکا نظام بنانے کے لیے اعلیٰ سطحی کمیٹی قائم کی تھی۔ اس سے قبل ریلوے کے قواعد کے مطابق ریلوے ٹکٹ کو کرنسی نوٹ تصور کیاجاتا تھا اور اس کے گم ہونے پر متبادل یا ڈپلیکیٹ کے اجراءکی کوئی پالیسی موجود نہیں تھی۔ وزیر ریلویز تجرباتی بنیادوں پر نظام کی کامیابی پر اس کا باقاعدہ افتتاح کریں گے۔

اسلام آباد (سیاسی رپورٹر) باوثوق ذرائع سے معلوم ہوا ہے کہ اگر نوازشریف صاحب اور اہل خانہ کے خلاف سپریم کورٹ نے فیصلہ دیا تو وہ اپنی جگہ مسلم لیگ ن کے کسی معتمد ایم این اے کو 2018ءکے الیکشن تک وزیراعظم منتخب کرائیں گے اور پارٹی صدر کے طور پر اپنے فیصلوں کے مطابق حکومت چلوائیں گے۔ اس سلسلے میں پہلے مریم نواز اور شہباز شریف کا نام لیا جاتا تھا وہ دونوں ایم این اے نہیں ہیں۔ سیٹ خالی کرا کر ان کو ایم این اے بنوانے میں ساڑھے تین سے چار ماہ لگیں گے۔ لہٰذا اسحاق ڈار کا نام سامنے آیا تو قانون دانوں نے مشورہ دیا کہ وہ ایک تو سنیٹر ہیں ایم این اے نہیں حالیہ منی لانڈرنگ کیس میں ملزم بھی ہیں۔ لہٰذا احسن اقبال کا نام بطور وزیراعظم طے ہوا۔ لیکن اب تین اور نام سامنے آ گئے ہیں اور وزیراعظم ہاﺅس میں ان پر بحث جاری ہے۔ ان میں سپیکر قومی اسمبلی ایاز صادق، وفاقی وزیر رانا تنویر حسین، حمزہ شہبازشریف کے نام شامل ہیں۔ حتمی اعلان سپریم کورٹ کی طرف سے فیصلہ آنے کے بعد کیا جائے گا۔