مور و(نمائندہ خبر یں) سابق صدر آصف علی زرداری نے کہاہے کہ یہ جو چھوٹے موٹے گندے انڈے ادھر ادھر جاتے ہیں ان گندے انڈوں کو کپتان بھی ٹکٹ نہیں دے گا‘ کپتان نے صرف مزا بنایا ہوا ہے ان کو لے کر تصویریں کھنچواتا پھر رہا ہے‘ میاں صاحب چار سال میں صرف 4 مرتبہ اسمبلی آئے اس سے زیادہ تو محمد خان جونیجو آیا تھا ‘ اگر یہی معیار ہوا تو دوسرا و زیر اعظم صرف ایک بار آئے گا۔ ہم نے چائنہ کے ساتھ دوستی کو آگے بڑھایا جس پر صرف ایک ملک کو اعتراض ہے جو میاں صاحب کا یار ہے‘ کشمیر کاز ہمارا اپنا ہے‘ اس لئے ہم کشمیر کی بات کرتے ہیں‘ بھارت تو نا گا لینڈ اور نیپال کو ہڑپ کر کے بیٹھا ہے۔ دنیا وہاں نہیں دیکھتی مودی صاحب کو گلے لگایا جارہا ہے۔ یہاں میاں صاحب مری میں بیٹھ کر جانوروں کے ساتھ کھیل رہاہے‘ بلاول نے 2 سال پہلے کہا کہ خدا کا واسطہ ہے وزیر خارجہ رکھو آپ دنیا کی ڈپلو میٹک جنگ ہار رہے ہو۔ ہفتہ کو مورو میں تقریب سے خطاب کرتے ہوئے آصف زرداری نے کہا کہ میاں صاحب آپ 4 مرتبہ اسمبلی آئے اور آپ خود کو اس ہاﺅس کا لیڈر کہتے ہو اس سے زیادہ تو محمد خان جونیجو آیا تھا۔ اگر یہی معیار ہوا تو دوسرا وزیر اعظم صرف ایک بار آئے گا۔ انہوں نے کہا کہ اگر میں نے پارلیمنٹ کو پاور نہ دی ہوتی تو آج میاں صاحب صدر ہوتے۔ سیاست میں بہت دور کا سوچنا پڑتا ہے۔ اگر میں نے چائنہ کی طرف دیکھا تو اس لئے نہیں دیکھا کہ پاکستان کو آج کا فائدہ ہے چائنہ کے ساتھ دوستی کو ہم نے آگے بڑھایا۔ اس لئے آگے بڑھایا کیونکہ آنے والے پاکستان کے بچوں کی اس میں بہتری ہے سوائے ایک ملک کے جس کو اعتراض ہے جو میاں صاحب کا یار ہے۔ دیگر ممالک کو معاشی ترقی پر کوئی اعتراض نہیں۔ اس ملک کے پاس ایسے ہتھیار نہیں کہ ہم خرید سکیں پاکستان نے کبھی کسی ملک کو دھمکی نہیں دی۔ آصف زداری نے کہا کہ کشمیر کاز ہمارا اپنا ہے کشمیر کاز اقوام متحدہ کی سب سے پرانی قرار داد ہے اس لئے ہم کشمیر کی بات کرتے ہیں اس لئے نہیںکرتے کہ پاکستان نے اپنی سرحد بڑھانی ہے۔ بھارت تو ناگا لینڈ اور نیپال کو ہڑپ کر کے بیٹھا ہے وہاں دنیا نہیں دیکھتی۔ مودی صاحب کو گلے لگایا جا رہا ہے۔ یہاں میاں صاحب مری میں بیٹھا اپنے جانوروں کے ساتھ کھیل رہاہے اس کو یہ سوچ نہیں مجھے یہ سوچ ہے ‘ بلاول کو یہ سوچ ہے۔ بلاول صاحب نے 2 سال پہلے کہا کہ خدا کے واسطے وزیر خارجہ رکھو۔ وزارت خارجہ کو مضبوط کرو آپ دنیا کی ڈپلومیٹک جنگ ہار رہے ہو ۔ آصف زرداری نے کہا کہ دوستو ںکو کہتا ہوں کہ آپ پر امید رہیں اگلی فتح آپ کی ہے۔ بھول جائیں یہ چھوٹے موٹے جو گندے انڈے ہمارے ادھر ادھر جاتے ہیں ان گندے انڈوں پر آپ آنکھ نہ رکھیں ان گندے انڈوں کو کپتان بھی ٹکٹ نہیں دے گا۔ کپتان نے صرف ایک مزا بنایا ہوا ہے کہ ان کو لے کر تصویریں کھنچواتا پھر رہا ہے۔ انہوں نے کہا کہ پاکستان میں اتنی صلاحیت ہے کوئی ایسی چیز نہیں ہے جو پاکستان میں نہ ہو۔ صرف ہمارے پاس دماغ نہیں ہے۔ اگر اسلام آباد ہماری بات سمجھنے لگے تو آج یہ پاور پلانٹ لگانے کی جو ناکام کوشش کر رہے ہیںاس میں کامیاب ہو جاتے۔ ہمیں جب بھی حکومت ملی ہے مشکلوں میں ملی ہے اور جب چھوڑا ہے تو بہتر چھوڑا ہے۔ جب بھٹو صاحب کو پاکستان ملا تو آدھا پاکستان ہاتھ سے نکل چلا تھا۔ 90 ہزار فوجی بھارت کی قید میں تھے اس کے باوجود انہوں نے بغیر جنگ لڑے ٹیبل پر اندرا گاندھی سے اپنے فوجی اور زمین دونوں واپس لئے۔ آصف زرداری نے کہا کہ ہم چائنہ کو اس بات پر لے کر آئے کہ آپ کو گرم پانیوں پر آناہے تاکہ آپ کے لئے بھی دوسرا سہارا بنے سمندر کا۔ انہوں نے کہا کہ اگر ملک کا مستقبل ہے تو پیپلز پارٹی کے پاس ہے ۔ میرے بچوں نے گھر کے نوکروں کی تنخواہ بڑھا دی ۔ بلاول اور آصفہ مستقبل کی لیڈر شپ ہے یہ ان کی سوچ ہے ۔ آصف زرداری نے کہاکہ ایک ٹویٹ بیٹیاں کرتی ہیں اور والد کو بھی سوچنا پڑتا ہے کہ اس کو لوں یا نہ لوں۔

لاہور(مانیٹرنگ ڈیسک) جے آئی ٹی میں کیپٹن صفدر کے جواب ہی مریم نواز کی طلبی کا باعث بنے وزیراعظم کے داماد نے کہا وہ تو درویش ہیں۔تفصیلات کے مطابق جے آئی ٹی نے کیپٹن صفدر سے بیرون ملک دوروں سے متعلق سوالات کئے تو انہوں نے کہا کہ بیرون ملک دوروں کے اخراجات کہاں سے ملتے ہیں وزیراعظم کی بیٹی کو پتا ہوگا۔سوال کیا گیا کہ آپکے بیٹے نے باہر سے تعلیم حاصل کی،اخراجات کیسے برداشت کئے؟ جواب میں کپٹن صفدر نے کہا کہ مجھے نہیں پتا، مریم نواز ہی جانتی ہیں۔جےآئی ٹی نے سوال کیا کہ آپ کے اور فیملی کے اخراجات کہاں سے ہورہے ہیں؟ تو انہوں نے کہا کہ میں تودرویش ہوں، گزارہ ہورہاہے۔جے ا?ئی ٹی نے پوچھا کہ آپ کا این ٹی این نمبر کیا ہے،ٹیکس دیتے ہیں ؟ کیپٹن صفدر نے جواب دیا کہ میرا کوئی این ٹی این نمبرنہیں۔

اسلام آباد( نامہ نگار خصوصی) آئی سی سی چیمپئنز ٹرافی کے فائنل میں روایتی حریف بھارت کو عبرتناک شکست دیکر ٹرافی اپنے نام کرنے والی قومی کرکٹ ٹیم کے اعزاز میں 4 جولائی کو وزیر اعظم ہاو¿س میں تقریب کا انعقاد ہوگا۔ ذرائع کے مطابق وزیراعظم سیکریٹریٹ کی طرف سے وزارت بین الصوبائی رابطہ امور کو تحریری طور پر آگاہ کیا گیاکہ وزارت پاکستان کرکٹ بورڈ سے رابطہ کرکے جامع پلان تیار کرے، کھلاڑی اور آفیشلز 4 جولائی کو اسلام آباد آئیں گے اور مقامی ہوٹل میں قیام کریں گے، انھیں فول پروف سکیورٹی میں ہوٹل سے وزیراعظم ہاو¿س پہنچایا جائے گا۔ یاد رہے کہ کھلاڑیوں کو وزیر اعظم کی طرف سے اعلان کردہ ایک ایک کروڑ، ہیڈکوچ مکی آرتھر، فٹنس اینڈ فیلڈنگ کوچ گرانٹ لیوڈن، بیٹنگ کوچ گرانٹ فلاور، فیلڈنگ کوچ اسٹیو رکسن، بولنگ کوچ اظہر محمود کو 50،50 لاکھ روپے ملیں گے، ٹیم منیجر طلعت علی، میڈیا منیجر رضا راشد، سوشل میڈیا منیجر عون زیدی، انچارچ ٹور آپریشنز شاہداسلم، اینالسٹ طلحہ اعجاز،سکیورٹی منیجر اظہر،فزیوتھراپسٹ شین ہیز اور مساجر ڈونلڈ ڈیو البرٹ کو25،25 لاکھ روپے انعامی رقم کے چیک دیے جائیں گے۔انعام حاصل کرنے والے کرکٹرز میں اظہرعلی، احمد شہزاد، فخر زمان، بابر اعظم، شعیب ملک، محمد حفیظ، حارث سہیل، سرفراز احمد، شاداب خان، عماد وسیم، محمد عامر، رومان رئیس، حسن علی، جنید خان، فہیم اشرف اور وہاب ریاض شامل ہونگے۔

اسلام آباد(خبر نگار خصوصی ) پاکستان تحریک انصاف کے سربراہ عمران خان نے کہا ہے کہ ریمنڈ ڈیوس کی کتاب سیاسی و عسکری قیادت کے تعاون کی شرمناک داستان ہے،یہ کتاب سے معلوم ہوا4 افراد کے سفاک قاتل کو کیسے سیاسی اور عسکری قیادت نے مل کر بچایا۔ ہفتہ کو عمران خان نے سماجی رابطے کی ویب سائٹ ٹوئٹر پرامریکی اہلکار ریمنڈ ڈیوس کی کتاب کے حوالے سے اپنے پیغام میں کہا ہے کہ یہ کتاب پورے ملک کو پڑھنی چاہیے کیونکہ اس سے علم ہوتا ہے کہ دنیا میں پاکستانیو کی عزت کیوں نہیں ہے۔ انہوں نے کہا ‘ریمنڈ ڈیوس کی کتاب سیاسی و عسکری قیادت کے تعاون کی شرمناک داستان ہے۔انہوں نے کہا یہ کتاب ملکی تاریخ کا شرمناک باب ہے جس سے پتہ چلتا ہے کہ 4 افراد کے سفاک قاتل کو کیسے سیاسی اور عسکری قیادت نے مل کر بچایا۔