لاہور(آئی این پی) سری لنکن کرکٹ ٹیم نے ایک بار پھر پاکستان کا دورہ کرنے سے انکار کردیا ہے۔پاکستان اور سری لنکا کے درمیان اکتوبر میں سیریز طے ہے،پی سی بی حکام نے سری لنکن بورڈ سے درخواست کی تھی کہ وہ 2 ٹی ٹوئنٹی میچز کے لیے اپنی ٹیم پاکستان بھجوائیں، چیئرمین پی سی بی کے مطابق سری لنکن حکام نے حامی بھرنے کے بعد اب معذرت کرلی ہے۔سری لنکن ٹیم کی جانب سے دورہ پاکستان سے انکار کے بعد اب سیریز کے تمام میچز یواے ای میں ہی ہوں گے، میچز کی تاریخیں سری لنکن بورڈ کو منظوری کے لیے بھجوادی گئی ہیں۔واضح رہے لاہور میں ہونے والے بم دھماکے کے بعد ورلڈ الیون کے دورئہ پاکستان کی چھوٹی سی امید بھی دم توڑنے لگی۔ستمبر میں متوقع سیریز کیلئے حکومت کی جانب سے سیکیورٹی کلیئرنس ملنے کا امکان بہت کم رہ گیا۔ورلڈ الیون کا دورئہ پاکستان ملک میں انٹرنیشنل کرکٹ کی بحالی کیلئے انتہائی اہمیت کا حامل سمجھا جا رہا تھا،آئی سی سی نے ٹیم بھجوانے کے فیصلے کی توثیق بھی کردی تھی، 3ٹی ٹوئنٹی میچز کیلئے مہمان کرکٹرز کی لاہور آمد ستمبر میں متوقع تھی، اہم غیرملکی کھلاڑیوں کی مصروفیات کو پیش نظر رکھتے ہوئے شیڈول طے کرنے کی اطلاعات ملیں۔رخصتی کے قریب چیئرمین پی سی بی شہریار خان کا کہنا تھا کہ ورلڈ الیون ستمبر کے وسط میں دورہ کرے گی تاہم اس ضمن میں کوئی خاص پیش رفت نظر نہیں آرہی تھی۔، یوا ین پی کے مطابق پی سی بی نے سیکیورٹی یقینی بنانے کیلئے پنجاب کے اعلی حکام سے رابطہ کیا لیکن پاناما کیس کی وجہ سے پیدا ہونے والی سیاسی صورتحال میں کوئی جواب موصول نہیں ہوا تھا،انتظامات کیلئے وقت بہت کم رہ جانے کی وجہ سے پہلے ہی ورلڈ الیون کیخلاف سیریز پر شکوک کے بادل منڈلارہے تھے۔ صرف موہوم سی امید باقی تھی کہ سیاسی حالات بہتر ہونے کی صورت میں شاید پنجاب حکومت سیکیورٹی فراہم کرنے کی حامی بھر لے، مگر فیروز پور روڈ پر دھماکے کے بعد امکانات نہ ہونے کے برابر رہ گئے ہیں۔ذرائع کے مطابق سیاسی اور امن و امان کی موجودہ صورتحال میں کرکٹ سیریز وزارت داخلہ اور قانون نافذ کرنے والے اداروں کی ترجیحات میں شامل نہیں رہی۔یاد رہے کہ 3مارچ 2009کو لاہور میں سری لنکن ٹیم پر دہشت گردوں کے حملے کے بعد سے پاکستانی میدان ویران ہیں،طویل تعطل کے بعد 2015میں زمبابوے ٹیم نے قذافی اسٹیڈیم میں 3ون ڈے اور 2ٹوئنٹی20میچز کھیلے، رواں سال پی ایس ایل ٹو کا فائنل بھی اسی وینیو پر ہوا، دونوں ایونٹس کے دوران سخت ترین سیکیورٹی انتظامات کیے گئے تھے، قانون نافذ کرنے والے اداروں اور سرکاری مشینری کو دن رات ایک کرنا پڑے، نہ صرف لاہور بلکہ پنجاب بھر سے آئے سیکیورٹی اہلکاروں کے حصار نے قذافی اسٹیڈیم کو ایک قلعے میں تبدیل کردیا تھا۔

لاہور(آئی این پی) شعیب اختر نے اپنے ایک حالیہ بیان میں کہا ہے کہ وہ دنیا کے واحد گیند باز ہیں جنہوں نے سب سے زیادہ بیٹسمینوں کو زخمی کیا لیکن انہوں نے اس کو کبھی انجوائے نہیں کیا، سوائے ایک بلے باز کے، آپ اندازہ لگا سکتے ہیں کہ وہ کون ہیں؟۔راولپنڈی ایکسپریس نے اپنے ان خیالات کا اظہار سماجی رابطوں کی ویب سائٹ ٹویٹر کے ذریعے کیا اور بتایا کہ وہ کھلاڑی سابق آسٹریلوی اوپنر میتھو ہیڈن تھے، جنھیں میں بری طرح سے گیند مارنے کی کوشش میں رہتا تھا، اور ایسا کرنے میں بہت مرتبہ کامیاب بھی رہا لیکن اب ہم بہت اچھے دوست ہیں۔شعیب اختر نے دعوی کیا کہ انہوں نے اپنے کرکٹ کیریئر کے دوران 19 بلے بازوں کو زخمی کر کے واپس پویلین بھیجا تھا، لیکن وہ بیٹسمینوں کو اپنی تیز رفتار گیندوں سے زخمی کرنے سے قطعی خوش نہیں ہوتے تھے، تاہم آسٹریلیا کے میتھو ہیڈن واحد بلے باز تھے جنھیں بری طرح سے گیندیں مارنے کی خواہش وہ خود کرتے تھے۔

لاہور( آن لائن ) قومی ٹیم کے آل راﺅنڈر عماد وسیم کی ”ممکنہ دلہنیا“ کے ساتھ تصاویر منظر عام پر آگئیں۔ تفصیلات کے مطابق عماد وسیم نے عامر لیاقت کے شو میں بولا تھا کہ وہ جس لڑکی سے شادی کرنے والے ہیں اس کا نام ”A“ سے شروع ہوتا ہے۔حال ہی میں سوشل میڈیا پر عماد وسیم کی ایک خاتون کے ساتھ بعض تصاویر گردش کر رہی ہیں جس کے بارے میں سوشل میڈیا پر قیاس آرائی کی جارہی ہے کہ یہ ممکنہ طور پر وہی لڑکی ہے جس سے عماد وسیم شادی کرنے والے ہیں۔اس بارے میں عماد وسیم کی جانب سے تاحال کوئی بیان سامنے نہیں آیاہے۔

لاہور(آئی این پی) قومی ٹیم کے وکٹ کیپر بلے باز کامران اکمل نے الزام عائد کیا ہے کہ سابق ہیڈ کوچ وقار یونس کی غلط پالیسیوں کی وجہ سے پاکستان کرکٹ دو ، تین سال پیچھے چلی گئی ہے ۔ نجی ٹی وی سے گفتگو کرتے ہوئے کامران اکمل کا کہنا تھا کہ وقار یونس ایک ناکام کوچ تھے اور انہوں نے پاکستان کرکٹ کو بہت نقصان پہنچایا،تجربے کرنے کے شوق میں انہوں نے جوش میں آکر ٹیم کے اہم بلے بازوں کو سائیڈ لائن کرکے پاکستان کرکٹ کو 2 سے 3سال پیچھے دھکیل دیا ۔کامران اکمل کا مزید کہنا تھا کہ انہیں تو علم نہیں لیکن وقار یونس کے بعض کھلاڑیوں سے تعلقات اچھے نہیں تھے اور وہ نہیں جانتے تھے کہ پاکستان کرکٹ کو آگے کیسے لے جانا ہے ، اس کا واضح ثبوت ورلڈ کپ 2015میں نظر آیا جب انہوں نے یونس خان سے اوپن کرنے کا کہا اور وکٹ کیپر بلے باز سرفراز احمد کو کئی اہم میچز میں نہیں کھلایا۔وکٹ کیپر بلے باز کا مزید کہنا تھا کہ وقار یونس نے کئی کھلاڑیوں کو حالات کے مطابق خود کو ایڈجسٹ کرنے اور ٹیم میں سیٹل ہونے کا موقع نہیں دیا ۔،انہیں یاد ہے کہ ایشیا کپ 2014میں عمر اکمل نے افغانستان کیخلاف میچ میں سنچری سکور کی اور اگلے ہی مقابلے میں وہ شاہد آفرید ی کے بعد بلے بازی کرنے میدان میں اترے،وقار بلاشبہ ایک لیجنڈری فاسٹ بالر ہیں تاہم بطور کوچ وہ مکمل طور پر ناکام رہے ہیں ۔وکٹ کیپر بلے باز کا مزید کہنا تھا کہ وقار یونس کے دور میں پاکستان کی تینوں فارمیٹس میں رینکنگ تنزلی کا شکار رہی،وہ ورلڈ کپ 2015کے بعد 6،7نئے کھلاڑی بنگلہ دیش کے دورے پر لے گئے اور ہمیں تاریخ میں پہلی مرتبہ بنگلہ دیش کیخلاف ٹی ٹونٹی اور ون ڈے سیریز میں شکست کا سامنا کرنا پڑا۔ان کا مزید کہنا تھا کہ وہ باب وولمر سمیت دیگر کئی کوچز کے ساتھ کھیل چکے ہیں اور وہ یہ کہ سکتے ہیں کہ وہ کوچز منصوبے بناتے اور ٹیم کو اکٹھا رکھتے تھے تاہم وقار یونس کا تمام تر فوکس صرف اور صرف ٹریننگ پر مرکوز رہا اور انہوں نے کھلاڑیوں کی صلاحیتیں بڑھانے اورکھیل بہتر کرنے پر کوئی کام نہ کیا جس کا سب سے بڑا نقصان ملکی کرکٹ کو ہوا۔

لاہور( این این آئی) سابق کرکٹر محسن حسن خان ویمنز کرکٹ ٹیم کی سلیکشن میں اختیارات ملنے سمیت اپنی سخت شرائط پر عہدہ سنبھالنے کیلئے تیار ہیں تاہم چیئرمین پی سی بی حتمی فیصلہ کرینگے۔میڈیا رپورٹ کے مطابق آئی سی سی ویمنز ورلڈ کپ میں قومی ٹیم کی ناقص ترین کارکردگی کے بعد پی سی بی نے ویمنز کرکٹ کو عالمی معیار کے مطابق بنانے کیلئے منصوبہ بندی کر لی ہے۔ ذرائع کے مطابق ویمنز ٹیم کے معاملات یونس خان کے سپرد کرنے کا فیصلہ کیا گیا تھا مگر جب بورڈ نے ان سے رابطہ کیا تو انہوں نے ذمہ داری لینے سے صاف انکار کر دیا۔ اس حوالے سے مصباح الحق کا نام بھی زیر غور تھا لیکن اب محسن حسن خان کو معاملات سونپنے کی تیاری کی جا رہی ہے۔ ذرائع کا کہنا ہے کہ ویمنز کرکٹ میں سفارش کی خبریں منظر عام پر آنے کیساتھ ساتھ سابق کوچز ٹیم میں سینئر کھلاڑیوں کی من مانی کی شکایات کر رہے ہیں جبکہ ورلڈ کپ کیلئے منتخب کی گئی کچھ کھلاڑیوں پر بھی سوالیہ نشان موجود ہے اور اس پر میڈیا کی جانب سے بھرپور تنقید کی جا رہی ہے۔ محسن حسن خان میرٹ کو برقرار رکھنے کی شہرت رکھتے ہیں اس لئے بورڈ انہیں ذمہ داری سونپنا چاہتا ہے۔ذرائع کے مطابق بورڈ کی جانب سے ان سے رابطہ کیا گیا ہے اور وہ کھلاڑیوں کی سلیکشن میں کچھ اختیارات سمیت اپنی سخت شرائط پر عہدہ سنبھالنے کیلئے تیار ہیں۔ انہیں ویمنز ٹیم کا ہیڈ کوچ بنایا جائے گا اور مکمل اختیارات دیتے ہوئے ہر قسم کی مداخلت سے گریز کیا جائے گا۔ اس حوالے سے ہوم ورک مکمل کر لیا گیا ہے مگر تبدیلی کے حوالے سے حتمی فیصلہ چیئر مین پی سی بی ہی کرینگے۔ شہریار خان کو ورلڈ کپ میں ویمنز ٹیم کی ناقص کارکردگی کے حوالے سے ٹیم مینجمنٹ کی رپورٹ بھی پیش کی جائے گی۔ ذرائع کے مطابق ویمنز ٹیم کے موجودہ کوچ صبیح اظہر نے اپنی رپورٹ میں ٹیم میں سینئر کھلاڑیوں کی من مانیوں کی نشاندہی کرتے ہوئے بڑے پیمانے پر اکھاڑ پچھاڑ کا مطالبہ کیا ہے جبکہ میڈیا میں آنیوالی رپورٹس کے مطابق ورلڈ کپ میں کپتان اور ہیڈ کوچ ایک پیج پر نہیں تھے اور بہت سے فیصلوں میں ثنا میر نے اپنی مرضی کی۔دوسری جانب پی سی بی کے مطابق 28 جولائی کو لاہور میں گورننگ بورڈ اجلاس میں ویمنز کرکٹ، کوچز کے کنٹریکٹ اور دیگر معاملات پر اہم فیصلے ہوں گے۔ ایک پی سی بی آفیشل نے رابطہ کرنے پر بتایا کہ محسن خان کا نام ویمنز کرکٹ کے حوالے سے زیر غور نہیں ۔