مچھر بھگانے والا سمارٹ فون بھی مارکیٹ میں آگیا

سیول(نیٹ نیوز) جنوبی کوریا کی مشہور موبائل ساز کمپنی نے دنیا کا پہلا مچھر بھگانے والا سمارٹ فون بنانے کا دعوی کیا ہے ۔ پاکستان میں بھی اکثر گھرانوں میں مچھر بھگانے والے ریپیلر اور سپرے خریدے جاتے ہیں لیکن افریقا اور دیگر ایشیائی ممالک میں مچھروں کی بہتات انسانی ہلاکتوں کی اب بھی بڑی وجہ ہے اور دعوی کیا گیا ہے کہ یہ فون الٹراسونک لہریں خارج کرکے مچھروں کو آپ سے دور رکھتا ہے ۔ ایل جی کا سیون آئی سمارٹ فون بہت مہنگا نہیں اور اسے گزشتہ ہفتے بھارتی موبائل کانگریس میں پیش کیا گیا تھا۔ تجزیہ کاروں کے مطابق یہ فون مچھروں سے پریشان ممالک میں اچھی فروخت حاصل کرسکتا ہے تاہم اس کے تکنیکی خواص زیادہ متاثر کن نہیں۔ مچھر بھگائے (موسکیٹو اوے ) اس فون کا دوسرا نام بھی ہے جو خون آشام مچھروں کو خاص صوتی لہروں سے دور بھگاتا ہے ۔ اس کی سب سے اہم بات یہ ہے کہ مچھر بھگانے والا یہ آلہ اسی کمپنی کی دیگر مصنوعات مثلا ٹی وی اور ایئرکنڈیشنر سے منسلک ہوسکتا ہے ۔ اس میں نہ ہی کوئی دوا ہے اور نہ کوئی کیمیکل بلکہ یہ 30 کلو ہرٹز کی الٹراسونک امواج خارج کرتا ہے جو اس کی کسینگ کی پچھلی طرف سے خارج ہوتی ہیں۔ اس کے ساتھ فون کو سیدھا رکھنے والا ایک سٹینڈ بھی دستیاب ہے ۔کمپنی کے مطابق یہ انسانوں کے لیے مکمل طور پر بے ضرر ہے جسے پہلے بھارت میں اور اس کے بعد دیگر ممالک میں فروخت کے لیے پیش کیا جائے گا۔