سری لنکن کھلاڑیوں کا پاکستان نہ آنیکا امکان،پی سی بی دورہ یقینی بنانے کیلئے سرگرم

لاہور(سپورٹس ڈیسک) پاکستان میں عالمی کرکٹ کی بحالی پر ایک بار پھر سے خطرات کے بادل منڈلانے لگے ہیں۔یواے ای میں جاری سیریز کا آخری ٹی ٹوئنٹی میچ جو کہ لاہور میں کھیلا جا نا ہے سری لنکن کھلاڑی اس کے لیے لاہور آنے کے لیے کترانے لگے ہیں ۔ذرائع کے مطابق سری لنکا کے زیادہ تر کھلاڑی لاہور میں میچ کھیلنے کے حق میں نہیں ہیں۔ورلڈ الیون کے دورہ پاکستان کے بعد سری لنکن ٹیم نے پاکستان آ کر کم از کم ایک ٹی 20 میچ کھیلنے کا اعلان کیا تو پاکستانیوں کو شکریہ ادا کرنے کیلئے الفاظ ہی نہ مل سکے۔ لیکن شائد پاکستانیوں کو یہ خوشی راس نہیں آئی کیونکہ سری لنکن ٹیم کے دورہ پاکستان پر ’نحوست‘ کے بادل منڈلانے لگے ہیں۔اس وقت متحدہ عرب امارات میں ٹیسٹ سیریز کھیلی جا رہی ہے جس کے بعد 5 میچوں پر مشتمل ون ڈے انٹرنیشنل سیریز کھیلی جانی ہے اور پھر 3 میچوں پر مشتمل ٹی 20 سیریز کی باری آئے گی جس کا ایک میچ لاہور میں کھیلا جانا ہے۔ ذرائع کا کہنا ہے کہ سری لنکن کھلاڑی اس موقع پر پاکستان کی مدد تو کرنا چاہتے ہیں لیکن ٹیم میں شامل زیادہ تر کھلاڑی لاہور میں ٹی 20 میچ کھیلنے کے حق میں نہیں ہیں جو ناصرف پاکستان کرکٹ بورڈ (پی سی بی) بلکہ پاکستانیوں کیلئے بھی افسوسناک اور تشویشناک ہے۔ذرائع کا مزید کہنا ہے کہ پی سی بی اور سابق قومی کرکٹرز اس ضمن میں بھرپور کوششیں جاری رکھے ہوئے ہیں تاکہ سری لنکن ٹیم کے دورہ پاکستان کو یقینی بنایا جا سکے لیکن اگر ٹیم میں شامل کھلاڑیوں نے پاکستان آنے سے انکار کر دیا تو پھر یہ خواہش ادھوری ہی رہ جائے گی جس کے ویسٹ انڈیز کے دورہ پاکستان پر بھی برے اثرات مرتب ہو سکتے ہیں۔