لاہور(خبر نگار)سابق صدر آصف علی زرداری نے کہا ہے کہ امیدوار انتخابات کی تیاری کریں،پنجاب میں بھرپور مقابلہ کریں گے، مرکز ہی نہیں پنجاب میں بھی آئندہ انتخابات کے بعد جیالوں کی حکومت ہوگی۔بلاول ہاﺅس لاہور میں گزشتہ روز پیپلز پارٹی سرگودھا ڈویژن کے صدر تسنیم قریشی،ملک خالد، قاضی غیاث الدین اور اقبال ٹکا نے شریک چیئرمین آصف علی زرداری سے ملاقات کی پارٹی امور اور آئندہ الیکشن کے حوالے سے تجاویز پر تبادلہ خیال کیا۔ آصف علی زرداری کا رہنماﺅں سے گفتگو کرتے ہوئے کہنا تھا کہ آر او الیکشن کے نتائج سیاسی جماعتوں کی مقبولیت کا نہیں دھاندلی پیمانہ ہوتے ہیں، ہم انتخابات سے قبل پنجاب میں سیاسی فضا بدل دیں گے، بڑی سیاسی شخصیات رابطے میں ہیں بہت جلد بڑے اعلانات ہوں گے۔ انہوںنے کہاکہ جس جماعت کے پاس جیالے ہوں اسے شفاف انتخابات میں کوئی نہیں ہرا سکتا۔ آصف علی زرداری نے کہا ہے کہ وی آئی پی احتساب سے دیگر صوبوں کو غلط پیغام دیا جا رہا ہے، شریف خاندان کے ساتھ بھی وہ سلوک کیا جائے جو پیپلزپارٹی کیساتھ کیا جاتا ہے، موجودہ حکومت نے ملک کی معیشت کو تباہ کر دیا، ناکام خارجہ پالیسی کی وجہ سے ہزاروں بیرون ملک مقیم پاکستانیوں کو واپس آنا پڑا ہے، آئندہ دور پاکستان پیپلزپارٹی کا ہی ہے،اقتدار میں آکر عوام سے ہونے والی ناانصافیوں کا ازالہ کریں گئے۔وہ منگل کو پیپلزپارٹی سرگودھا کے ٹکٹ ہولڈرز تسنیم احمد قریشی، ملک خالد اعوان، ملک رضوان آصف، ملک خالدداد، نعیم صادق، سجاد خان بلوچ، ملک انور بلوچ اور دیگر سے بلاول ہاﺅس لاہور میں ملاقات میں گفتگو کر رہے تھے ،اس موقع پر سابق وزیراعظم راجہ پرویز اشرف بھی موجود تھے۔ سابق صدر آصف علی زرداری نے پارٹی کے ٹکٹ ہولڈروں، عہدیداروں اور کارکنوں کو ہدایت کی ہے کہ چیئرمین بلاول بھٹو زرداری کی قیادت میں منظم اور متحد ہو جائیں۔ آئندہ انتخابات میں فتح پاکستان پیپلزپارٹی کی ہی ہوگی۔ سابق صدر نے کہا کہ موجودہ حکومت نے ملک کی معیشت کو تباہ کر دیا ہے۔ ناکام خارجہ پالیسی کی وجہ سے ہزارون کی تعداد میں بیرون ملک مقیم پاکستانیوں کو واپس آنا پڑا ہے۔ انہوں نے کہا کہ ملک میں ایک قانون ہونا چاہیے۔ شریف خاندان کے ساتھ بھی وہ سلوک کیا جائے جو پاکستان پیپلزپارٹی کے ساتھ کیا جاتا ہے۔ انہوں نے کہا کہ وی آئی پی احتساب سے دیگر صوبوں کو غلط پیغام دیا جا رہا ہے۔ آصف علی زرداری نے کہا کہ پاکستان پیپلزپارٹی کی حکومت میں معیشت مستحکم ہوئی۔ سرکاری ملازمین کی تنخواہوں اور پنشن میں اضافہ کیا گیا۔ جن ملازمین کو ناانصافی کا شکار کرکے ملازمتوں سے زبردستی نکالا گیا تھا کو بحال کیا گیا۔ ان کے ساتھ کی جانے والی ناانصافی کا ازالہ کیا گیا۔ آصف علی زرداری نے کہا کہ جب پیپلزپارٹی اقتدار میں ہوتی ہے تو عوا م کو ریلیف ملتا ہے۔ مہنگائی کو کنٹرول کیا جاتا ہے اور ریاست کے ثمرات پورے مک کے عوام تک پہنچتے ہیں۔ مگر جب پیپلزپارٹی کی حکومت نہیں ہوتی تو اہل اقتدار عوام کو ریلیف دینے میں تنگ دلی کا مظاہرہ کرتے ہیں۔ آصف علی زرداری نے کہا کہ آئندہ دور پاکستان پیپلزپارٹی کا ہی ہے۔ پاکستان پیپلزپارٹی اقتدار میں آکر عوام سے ہونے والی ناانصافیوں کا ازالہ کرے گی۔
