رائے ونڈ (نامہ نگار) اے اللہ دنیا میں عالم اسلام کو امن کا گہوارہ بنادے ،ہمارے گناہوں کو درگزر کرکے ہمیں معاف فرمادے ،اپنی راہ پر چلنے والا بنادے ،اپنے حبیب کی سنتوں پر عمل کرنے والوں میں شامل فرما،ہمیں دعوت و تبلیغ کے مشن کو زندہ کرنے والا بنا دے ،ہمیں حلال رزق عطا فرما ،ہم غیر اللہ سے ناطہ توڑ کر صرف تجھ سے مدد مانگیں ،ہمارے زنگ آلودہ دل و دماغ کو اپنے کرم اور رحمت سے دھو ڈال ،ہمیں انصاف نہیں تیرا رحم و کرم چاہئے ۔رائے ونڈ میں منعقدہ سالانہ عالمی تبلیغی اجتماع کا پہلا مرحلہ امیر جماعت حاجی عبدالوہاب کی رقت آمیز اجتماعی دعا کیساتھ پر امن طور پر اختتام پذیر ہوگیا ،اجتماعی دعا میں کم و بیش دس لاکھ افراد نے شرکت کی ،ہزاروں افراد نے اجتماعی دعا کے بعد چلہ کیلئے وقت لکھوایا ،سینکڑوں جوڑوں کا نکاح کروایاگیا ،ہزاروں جماعتیں تشکیل کیلئے اندرون و بیرون ملکوں کیلئے کمر بستہ ہوگئیں ،شرکاءنے تبلیغی جماعت کے کارکنوں کی معاونت اور محکمانہ اہلکاروں کی مدد سے واپسی کا آسان راستہ اختیار کیا اور دیکھتے ہی دیکھتے لاکھوں کا مجمع چند گھنٹوں میں اپنی منازل کی طرف روانہ ہوگیا ،آئندہ جمعرات کو اجتماع کی تیاریوں کیلئے پنڈال کی صفائی کا کام شروع کردیا گیا ہے ،تاہم محکمانہ کیمپ تاحال جوں کے توں موجود رہیں گے ،کسی اہم حکومتی شخصیت نے اجتماعی دعا میں شرکت نہیں کی ،یادرہے کہ تبلیغی جماعت کے معتبر اکابرین نے چند سالوں سے حلقہ خواص کو مکمل طور پر بند کردیا تھا جس کی وجہ سے کسی خاص شخصیت کا خاص طریقے سے استقبال اور قیام کا خاص انتظام نہیں کیا جاتا ،جس کی وجہ سے اہم سیاسی شخصیات کی شرکت کم ہوگئی ہے ،اجتماع کے پرامن گزرنے پر قانون نافذ کرنے والے اداروں کے سربراہان نے اپنے کیمپوں میں شکرانے کے نوافل ادا کئے ،پہلے مرحلہ میں ہجوم گزشتہ سالوں کی نسبت زیادہ رہا ،دعا میں برما سمیت مسلمانان عالم اسلام پرمختلف ملکوں میں نازل مصائب سے چھٹکارا کیلئے اللہ کے حضور گڑگڑا کر اور نام لیکر دعاکی گئی ۔
انصاف نہیں اللہ تیرا رحم و کرم چاہتے ہیں، حاجی عبدالوہاب کا روح پرور خطاب
