لاہور (مانیٹرنگ ڈیسک) گردہ ٹرانسپلانٹ سکینڈل میں تہلکہ خیز انکشافات سامنے آنے لگے، پہلا غیرقانونی گردہ ٹرانسپلانٹ آپریشن شریف میڈیکل کمپلیکس میں کیا گیا۔ نواز شریف کے پرسنل سیکرٹری کے بھائی کو گردہ لگایا گیا۔ نجی ٹی وی کے مطابق گردہ ٹرانسپلانٹ سکینڈل میں گرفتار ہونے والی نرس صفیہ نے انکشاف کیا ہے کہ پہلا آپریشن شریف میڈیکل کمپلیکس میں کیا گیا۔ نواز شریف کے سیکرٹری کے بھائی جاوید کو گردہ لگایا گیا۔ آپریشن ڈاکٹر ذکی نے کیا۔ صفیہ بی بی نے بتایا کہ بشیر نامی شخص شکار تلاش کر کے لاتا جن میں زیادہ تر بھٹہ مزدور ہوتے تھے، گردہ کے عوض 2لاکھ روپے ادا کئے جاتے جبکہ ڈاکٹر خود ایک آپریشن کے 13 لاکھ روپے وصول کرتا تھا۔

مظفرگڑھ (خصوصی رپورٹ) رکن قومی اسمبلی اور عوام راج پارٹی کے سربراہ جمشید دستی نے اپنے سیاسی حریفوں کے علاقے میں موچی کی دکان کھول لی ہے۔ نجی ٹی وی کے مطابق رکن قومی اسمبلی جمشید دستی نے سیاسی حریف حنا ربانی کھر کے آبائی علاقے سنانواں میں موچی کی دکان کھو لی ہے اور وہ سارا دن شہریوں کے جوتے پالش بھی کرتے ہیں اور ان کی سلائی بھی کرتے ہیں۔میڈیا سے گفتگو کرتے ہوئے جمشید دستی نے اس کی وضاحت کرتے ہوئے کہا کہ وہ بنیادی طورپر ایک مزدور پیشہ انسان ہیں اگر رکن قومی اسمبلی نہ بھی رہے تو وہ محنت مزدوری کرکے اپنا پیٹ پال لیں گے۔رکن قومی اسمبلی نے مخالفین پر تنقید کرتے ہوئے کہا کہ اگر علاقے کا سردار یا وڈیرہ عوام کی خدمت کرے گا تو وہ اس کے خلاف الیکشن نہیں لڑیں گے کیونکہ عوام کے ووٹوں سے ایوان میں جانے کے بعد یہ لوگ عوام کو منشیوں کے رحم وکرم پر چھوڑ دیتے ہے میں ایسا نہیں ہونے دوں گا۔

لاہور (خصوصی رپورٹ) محکمہ جنگلی حیات اور بیئر ریسرچ سنٹر کے باہمی اشتراک سے ریچھ کتے کی لڑائی میں استعمال ہونے والے ریچھ اور سڑکوں پر تماشا کرنے والے ریچھوں کے مالکان کو متبادل روزگار کیلئے معقول رقم کی فراہمی کا فیصلہ کیا گیا ہے اور اس ضمن میں جلد ہی ایک مفاہمتی یادداشت پر دستخط کر دیئے جائیںگے۔ ڈائریکٹر جنرل جنگلی حیات و پارکس پنجاب خالد عیاض خان نے کہا کہ تماشا دکھانے والوں کو ریچھ قبضہ میں لے کر انہیں متبادل روزگار فراہم کرنے کیلئے معقول رقم دی جائے گی اور قبضہ میں لئے گئے ریچھوں کو چپ لگا کر انہیں ان کی بنائی سینکچوری میں چھوڑ دیا جائے گا۔ سینکچوری میں رکھے جانے والے ریچھوں کو مائیکرو چپ لگانے کا مقصد گاہے بگاہے ان کی موجودگی اور حرکات و سکنات کو چیک کرنا ہے تاہم ایسے مداری جو اپنا ریچھ نہ دینا چاہیں کی رجسٹریشن کی جائے گی۔ اس اقدام سے خانہ بدوشوں کے پاس موجود ریچھ کی رجسٹریشن اور آئندہ کیلئے جنگل سے بچہ ریچھ کو پکڑنا اور کتے کی لڑائی اور سڑکوں پر تماشا دیکھنے کے عمل کو روکنا ممکن ہو سکے گا۔ سندھ میں پائے جانے والے بھورے ریچھ کو تحفظ شدہ جانور قرار دیا گیا ہے اور قوانین کی خلاف ورزی کرنے والوں کیلئے باقاعدہ سزائیں بھی مقرر ہیں۔

کراچی (خصوصی رپورٹ) اورنگی ٹاﺅن میں بھتہ نہ دینے پر الیکٹرونکس کی دکان پر دستی بم سے حملے کی تحقیقات کے دوران شہر کے مختلف علاقوں میں کالعدم تنظیموں کے مضبوط نیٹ ورک کے شواہد سامنے آئے ہیں۔ پولیس ذرائع کا کنا ہے کہ ڈسٹرکٹ ویسٹ کے مختلف علاقوں میں کالعدم تنظیموں کے افراد کی نقل و حرکت اور موجودگی کی اطلاعات مل رہی ہیں اور کراچی میں کالعدم تنظیموں کے مضبوط نیٹ ورک کا انکشاف ہوا ہے۔ کالعدم تنظیموں کا نیٹ ورک شہر کے متعدد علاقوں میں قائم ہے جن میں اورنگی ٹاﺅن‘ منگوپیر‘ بلدیہ اتحاد ٹاﺅن اور لانڈھی مجید کالونی شامل ہیں۔ سندھ میں لشکر جھنگوی جنداللہ اور حرکت الاحرار مشترکہ طور پر کارروائی کرتی ہیں۔ کالعدم تنظیموں کے نیٹ ورک کا سربراہ علی سفیان عرف صفدر ہے جبکہ پولیس اہلکاروں اور سکیورٹی فورسز پر حملے کرنا سابق پولیس اہلکار داﺅد محسود کے ذمہ ہے۔ ذرائع کا کہنا ہے کہ علی سفیان بلوچستان کے علاقے وڈھ سے اپنا نیٹ ورک چلاتا ہے جبکہ داﺅد محسود لانڈھی کے علاقے قائدآباد میں نیٹ ورک چلا رہا ہ۔ دہشت گرد اور خودکش حملہ آور افغانستان سے بلوچستان کے راستے سندھ میں داخل ہوتے ہیں۔ کراچی میں دہشت گرد کچی آبادیوں او افغان بستوں میں رہائش پذیر ہیں۔ ہر گروپ میں پچاس دہشت گرد شامل ہیں جس میں 10 ٹارگٹ کلر اور پانچ سہولت کار خودکش جیکٹ‘ دھماکہ خیز مواد سے بھری گاڑیاں اور موٹرسائیکل بنانے کے ماہر بھی شامل ہیں۔ ذرائع کا کہنا ہے کہ عی سفیان وڈھ کے ایک مدرسے میں رہائش پذیر ہے جہاں سے فون کے ذریعے ہدایت جاری کرتا ہے۔ شہر میں ہونے والی بھتہ خوری اور کریکر حملوں میں بھی یہی گروپ ملوث ہے۔ ذرائع نے دعویٰ کیا ہے کہ گزشتہ روز اورنگی ٹاﺅن میں کئے گئے دستی بم حملے میں یہی گروپ ملوث ہے۔ دوسری جانب کالعدم تنظیموں کے اراکین نے اپنے خرچے پورے کرنے کے لئے ایک بار پھر علاقے کی بڑی مارکیٹوں سے بھتہ کی وصولی شروع کردی ہے اور بھتہ نہ دین والوں پر فائرنگ اوردستی بم سے حملوں کے واقعات بھی سامنے آرہے ہیں۔ اس سلسلہ میں ایس ایچ او اورنگی ٹاﺅن یاسین گجر نے بتایا کہ علاقے میں کالعدم جہادی تنظیموں کے نیٹ ورک نے ایک بار پھر سر اٹھانا شروع کردیا۔ انہوں نے کہا کہ پولیس نے علاقے میں مخبروں کا جال پھیلا دیا اور جلد ہی ملزمان کا قلع قمع کردیاجائے گا۔ پولیس ذرائع کے مطابق واقعہ کی سی سی ٹی وی فوٹیج حاصل کرلی گئی ہے جس میں بم دھماکے میں ملوث ملزمان کے چہرے بھی واضح ہیں لیکن اس کے باوجود پولیس ملزمان تک نہیں پہنچ سکی ہے۔