لاہور (شوبزڈیسک) ڈسٹری بیوشن کلب کے زیر اہتمام فہد مصطفے اور مہوش حیات کی ” لوڈ ویڈنگ“ پندرہ مارچ کو دوبارہ سنیماﺅں کی زینت بنے گی ۔جہیز کے موضوع پر بنائی گئی رومانوی کامیڈی فلم راجھستان فلم فیسٹیول میں بہترین تفریحی فلم کا اعزاز بھی حاصل کرچکی ہے ۔معیاری فلموں کے شائقین کی ڈیمانڈ کے مد نظر ڈسٹری بیوشن کلب جمعہ پندرہ مارچ سے لاہور ، کراچی اور اسلام آباد سمیت ملک بھرکے سنیماﺅں میں سپر ہٹ فلم ” لوڈ ویڈنگ “ کی دوبارہ نمائش کا آغاز کررہا ہے تاکہ سنیما گھروں میں آنے والے شائقین کو پیسہ وصول معیاری تفریح حاصل ہوسکے۔ پروڈیوسر فضا علی میرزا اور ڈائریکٹر نبیل قریشی کی ڈائریکشن میں بنی فلم نے ہلکے پھلکے انداز میں سماجی مسئلے جہیز کے خاتمے کی جانب شائقین کی توجہ مبذول کروائی تھی جبکہ فلم میں فہد مصطفے اور مہوش حیات کے منفرد کردار ، ہٹ میوزک اور پنجاب کے بیک گراﺅنڈ میں رچی کہانی نے بھی شائقین کے ساتھ نقادوں کو بھی خوب متاثر کیا تھا ۔ عیدالاضحی پر ریلیز ہونے والی فلم لوڈ ویڈنگ نے10کروڑ سے زائد بزنس کیا تھا ۔جبکہ اسے رواں برس راجھستان میں ہونے والے فلم فیسٹیول میں بہترین فلم کے اعزاز سے بھی نوازا گیا تھا ۔ ٹریڈ حلقوں کے مطابق سماجی آگاہی کیلئے بنائی گئی ”لوڈ ویڈنگ“ ایور گرین فلم ہے جسے شائقین فیملیز کے ساتھ دیکھ کر لطف اندوز ہونگے۔۔
فہد مصطفٰے اور مہوش کی ” لوڈ ویڈنگ“آج دوبارہ نمائش ہو گی
