بنگلادیش میں کھانے سے بال نکلنے پر شوہر نے بیوی کو گنجا کردیا

ڈھاکا: بنگلادیش میں ناشتے میں سے بال نکلنے پر غصے سے بھپرے ہوئے شوہر نے جبراً بیوی کے سر کو مونڈھ دیا۔بین الاقوامی خبر رساں ادارے کے مطابق بنگلا دیش میں شوہر نے معمولی غلطی پر 23 سالہ بیوی کو مارا پیٹا اور سر کے بال مونڈھ دیئے۔  پولیس نے فوری کارروائی  کرتے ہوئے 35 سالہ شوہر ببلو مونڈال کو حراست میں لے لیا ہے۔  بیوی کے ساتھ زور زبردستی، غیر انسانی سلوک اور مارپیٹ کے الزام میں ملزم کو 14 سال جیل ہوسکتی ہے۔پولیس ترجمان نے میڈیا کو بتایا کہ  گاؤں کے ایک رہائشی نے  واقعہ کی اطلاع دی۔ شوہر نے اقبالی بیان میں اعتراف کیا ہے کہ کھانے میں سے بیوی کا بال نکلا تھا جس پر غصے میں آکر اسے گنجا کردیا۔ بنگلادیش میں خواتین کے ساتھ نارواسلوک کے واقعات عام ہیں۔واضح رہے کہ  بنگلادیش میں رواں برس کے پہلے 6 ماہ میں 630 خواتین کو جنسی زیادتی کا نشانہ بنایا گیا جن میں 37 کو زیادتی کے بعد قتل کردیا گیا جب کہ 7 نے خودکشی کرلی تاہم کسی ملزم کو سزا نہیں ہوسکی۔