لاہور:(ویب ڈیسک) ملتان سلطانز اور کوئٹہ گلیڈی ایٹرز کا میچ بارش سے متاثر ہونے کا امکان ہے اور ایسی صورت میں کوئٹہ کی فائنل فور میں رسائی کے امکانات معدوم ہو جائیں گے۔پاکستان سپر لیگ کے پانچویں ایڈیشن میں سنسنی خیز مقابلوں کا سلسلہ جاری ہے اور ابھی تک صرف ملتان سلطانز ہی پلے آف مرحلے میں رسائی حاصل کرنے میں کامیاب رہی ہے جب کہ دیگر تمام ٹیموں کی بقیہ میچز ہی ان کی پوزیشن واضح کرسکیں گے تاہم آج اگر بارش کے باعث میچ نہیں ہوا تو ایسی صورت میں دونوں ٹیموں کو ایک ایک پوائنٹ ملے گا جس کے بعد کوئٹہ گلیڈی ایٹرز کی اگلے مرحلے میں رسائی تقریباً ناممکن ہوجائے گی۔پی ایس ایل 5کا 25واں میچ بدھ کی شام 7بجے قذافی اسٹیڈیم لاہور میں کھیلا جائے گا، شکستوں کے گرداب میں پھنسے کوئٹہ گلیڈی ایٹرز کو بقا کی جنگ لڑنا ہے،سرفراز احمد کی قیادت میں ٹیم نے اب تک 8میچز میں صرف 3جیتے ہیں،5 میں اسے شکست ہوئی،6پوائنٹس حاصل کرنے کے بعد فائنل فور مرحلے تک رسائی کی موہوم سی امید باقی رکھنے کیلیے اسے اگلے دونوں مقابلوں میں فتح کی ضرورت ہے۔کوئٹہ گلیڈی ایٹرز اب تک ایونٹ میں 8 میچ کھیل کر آخری پوزیشن پر ہے اور لاہور قلندرز کیخلاف گذشتہ میچ میں کوئٹہ گلیڈی ایٹرز 100 کا مجموعہ بھی حاصل نہیں کرپائے تھے، شین واٹسن اور جیسن روئے کی کارکردگی میں تسلسل نہیں،احمد شہزاد مسلسل ناکام ہیں، 2اننگز کے بعد جارح مزاج بیٹسمین اعظم خان کا بیٹ بھی خاموش ہے،سرفراز احمد بھی ناکامی کا شکار ہیں۔دوسری جانب ملتان سلطانز نے 7 میچز میں 5 فتوحات پائیں، ایک شکست اور ایک بے نتیجہ مقابلے کی مدد سے ٹیم نے11پوائنٹس جوڑ کر فائنل فور مرحلے میں جگہ پکی کرلی ہے، اوپنرز جیمز ونس اور ذیشان اشرف اچھی فارم میں ہیں،مڈل آرڈر میں معین علی، کپتان شان مسعود، رلی روسو اور خوشدل شاہ بڑے اسکور کی راہ ہموار کرسکتے ہیں،شاہد آفریدی نے قذافی اسٹیڈیم میں بارش کی وجہ سے نامکمل رہنے والے میچ میں فارم کی جھلک دکھائی تھی۔
