الیکشن کمیشن آف پاکستان کا کہنا ہے کہ حلقہ بندیوں کی فہرستیں 25 اکتوبر کو شائع ہوں گی۔
تفصیلات کے مطابق الیکشن کمیشن میں چیف الیکشن کمشنر سکندر سلطان راجہ کی زیر صدارت چاروں صوبوں میں بلدیاتی انتخابات سے متعلق اجلاس ہوا۔
اجلاس میں صوبوں میں بلدیاتی انتخابات کے انعقاد کے انتظامات پر کمیٹی کو بریفنگ دی گئی۔
بریفنگ میں بتایا گیا کہ پنجاب اور کے پی کے میں حلقہ بندیوں کا کم جاری ہے ، حلقہ بندیوں کی فہرستیں 25 اکتوبر کو شائع ہوں گی۔
بریفنگ میں مزید بتایا گیا کہ صوبائی الیکشن کمشنرز سے ڈی آر او ، آر او اور اے آر او کی تعیناتی کے لیے تجاویز مانگ لی گئی ہیں۔
پنجاب اور کے پی کے میں الیکشن میٹریل کے لیے ضروری اقدامات بھی شروع کردیے گئے ہیں۔الیکشن میٹریل کی خریداری و حصول کے لیے متعلقہ اداروں سے ابتدائی میٹنگ ہوئی ہے۔
بریفنگ میں بتایا گیا کہ سندھ میں انتخابات کے انعقاد کےلیے حلقہ بندیوں کے شیڈول کا نوٹیفیکیشن جاری کردیا گیاہے۔
بریفنگ میں کہا گیا کہ پنجاب حکومت نے بار ہا یاد دیانی کے باوجود پنجاب لوکل گورنمنٹ الیکشن رولز شائع نہیں کیے جس کی وجہ سے انتخابات کے انعقاد میں دشواری آ رہی ہے۔
بلوچستان میں انتخابات میں حائل رکاوٹوں کو بروقت دور کرنے کےلیے ضروری قانون سازی کی جائے گی۔
الیکشن کمیشن نے الیکشن کے انعقاد کے لیے کیے جانے والے اب تک کے انتظامات پر اطمینان کا اظہار کیا۔
