ملک میں براہ راست غیرملکی سرمایہ کاری میں جاری مالی سال کے ابتدائی دوماہ میں گزشتہ مالی سال کے اسی عرصہ کے مقابلے میں 40 فیصد اضافہ ریکارڈ کیا گیا ہے۔
تفصیلات کے مطابق رواں مالی سال کے دو ماہ جولائی اوراگست میں مجموعی طور پر 22 کروڑ 70 لاکھ ڈالر کی براہ راست غیرملکی سرمایہ کاری ہوئی ہے جو گزشتہ مالی سال کے اسی عرصہ کے مقابلے میں 40 فیصد زیادہ ہے۔
اسٹیٹ بینک کی جانب سے جاری کردہ اعداد و شمارکے مطابق جولائی سے لے کر اگست 2020 تک کی مدت میں ملک میں براہ راست غیرملکی سرمایہ کاری کا حجم 227 ملین ڈالر ریکارڈکیا گیا جبکہ گزشتہ مالی سال کے ابتدائی دوماہ میں ملک میں براہ راست غیرملکی سرمایہ کاری کا حجم 162 ملین ڈالرریکارڈکیا گیا تھا۔
اسٹیٹ بینک کی رپورٹ میں کہا گیا ہے کہ سب سے زیادہ براہ راست غیرملکی سرمایہ کاری ناروے، مالٹا اور ہالینڈ کی جانب سے کی گئی ہے جس کا مجموعی تناسب 54 فیصد بنتا ہے جبکہ ناروے نے اس عرصہ میں 45 ملین ڈالر، ہالینڈ نے 41 ملین ڈالراورمالٹا کے سرمایہ کاروں نے 37 ملین ڈالرکی براہ راست غیرملکی سرمایہ کاری کی ہے۔
اسٹیٹ بینک کی رپورٹ میں مزید کہا گیا ہے کہ فنانشل بزنس اورکمیونیکیشن دوایسے شعبے ہیں جہاں سب سے زیادہ غیرملکی سرمایہ کاری ریکارڈ کی گئی ہے جبکہ فنانشل بزنس کے شعبہ میں جاری مالی سال کے ابتدائی دوماہ میں 85 ملین ڈالر اورکمیونیکیشن کے شعبہ میں 36.5 ملین ڈالر کی براہ راست غیرملکی سرمایہ کاری ریکارڈکی گئی ہے اوراسی طرح تیل وگیس کے شعبہ میں 34.3 ملین ڈالر کی براہ راست غیرملکی سرمایہ کاری ہوئی۔
