اسلام آباد: حکومت پاکستان نے عالمی وبا کورونا وائرس سے نمٹنے کیلئے ایشیائی ترقیاتی بینک(اے ڈی بی) کے ساتھ2 ملین ڈالر گرانٹ کا معاہدہ کیا ہے۔
سیکریٹری اقتصادی امور اور ایشیائی ترقیاتی بینک حکام کے نے معاہدے پر دستخط کر دیئے ہیں۔ ایشیائی ترقیاتی بینک گرانٹ کورونا ایمرجنسی رسپانس پروگرام کے تحت دے گا۔
گرانٹ ہیلتھ ورکرز کی تربیت اور بائیو سیفٹی لیب کے قیام کےلیے استعمال ہوگی۔ معاہدے کے بعد سیکریٹری اقتصادی امور نے کہا کہ ایشیائی ترقیاتی بینک کی طرف سے گرانٹ کے مشکورہیں۔
کنٹری ڈائریکٹر اے ڈی بی نے کہا کہ انسداد کورونا کےلیے حکومت پاکستان کے اقدامات قابل ستائش ہیں۔
خیال رہے کہ چند ماہ قبل ایشیائی ترقیاتی بینک نے اپنی رپورٹ میں خدشہ ظاہر کیا تھا کہ پاکستان میں کورونا سے23 لاکھ نوجوان بے روزگار ہوسکتے ہیں۔
اے ڈی بی کی رپورٹ کے مطابق کورونا وائرس کے باعث پاکستان میں بیروزگاری بڑھی، 3 ماہ کے عرصے میں 15 لاکھ افراد بیروزگار ہوئے۔
رپورٹ میں کہا گیا ہے کہ کورونا وائرس کے باعث ایشیا پیسیفک ریجن کے ممالک بری طرح متاثر ہوئے، ریجن میں تقریباً ڈیڑھ کروڑ افراد بیروزگار ہوئے۔
اے ڈی بی نے اپنی پورٹ میں کورونا وائرس کے باعث عالمی معیشت کو تین ماہ میں 5 ہزار800 ارب ڈالر کے نقصان کا اندیشہ ظاہر کیا تھا۔
رپورٹ کے مطابق کورونا سے چھ ماہ میں نقصانات 8 ہزار800 ارب ڈالر تک پہنچ سکتے ہیں۔عالمی معاشی ترقی کی شرح 9 اعشاریہ 7 فیصد تک متاثرہونے کا خدشہ ہے۔
عالمی معیشت کے متاثر ہونے میں 30 فیصد حصہ ایشیا کا ہے اور دنیا کی پیداوار1700 سے 2500 ارب ڈالر تک متاثرہوسکتی ہے۔
ایشیائی ترقیاتی بینک کے مطابق عالمی سطح پر 15 سے 24 کروڑ افراد بے روزگار ہوسکتے ہیں جب کہ ایشیا میں 10 سے 16 کروڑ افراد کی نوکریاں ختم ہوسکتی ہیں۔ 6 ماہ میں 5 کروڑ سے زائد افراد غربت کی لکیر سے نیچے چلے جائیں گے۔
