سابق وفاقی وزیر اور مسلم لیگ (ن) کے سینیئر رہنما احسن اقبال کا کہنا ہے کہ اپوزیشن نے آرمی چیف سے حکومت گرانے کا کوئی مطالبہ نہیں کیا، یہ وزیر اعظم کے اندر کا خوف بول رہا ہے۔
لاہور میں (ن) لیگ کے دیگر رہنماؤں کے ہمراہ پریس کانفرنس کرتے ہوئے احسن اقبال نے کہا کہ ‘اپوزیشن نے آرمی چیف سے حکومت گرانے کا کوئی مطالبہ نہیں کیا، یہ وزیر اعظم کے اندر کا خوف بول رہا ہے، عمران خان کلین بولڈ، اسٹمپ آؤٹ ہوچکے ہیں لیکن ضدی بچے کی طرح کریز پر کھڑے ہیں، جبکہ اپوزیشن عوام کی طاقت کے ساتھ اس سلیکٹڈ حکومت کو گھر بھیجے گی’۔
اداروں میں تشویش اور ناراضگی سے متعلق انہوں نے کہا کہ ‘اداروں میں ناراضگی ہوگی تو آپ کی کارکردگی سے ہوگی، ادارے ناراض اس پر ہوں گے کہ آپ نے معیشت کا بیڑہ غرق کردیا ہے، اداروں میں تشویش اس پر ہوسکتی ہے کہ سعودی عرب اور متحدہ عرب امارات جیسے دوست ملک دور ہوگئے’۔
