وفاقی وزیر داخلہ شیخ رشید احمد نے کہا کہ عمران خان کی خواہش ہے افغانستان میں امن ہو۔
تفصیلات کے مطابق وفاقی وزیر داخلہ شیخ رشید احمد نے پریس کانفرنس کرتے ہوئے کہا کہ وزارت داخلہ میں بارڈر مینیجمنٹ پر اہم میٹنگز کی ہیں۔
انہوں نے کہا کہ جلدازجلد افغانستان کیساتھ فینسنگ مکمل کردیں گے ، پاکستان کی افواج اور ادارے ملکی حفاظت کیلئے ہمہ وقت تیار ہوتے ہیں ، امید ہے اس دفعہ افغانستان کی صورتحال کے باعث وہ صورتحال پیدا نہ ہوگی جو پہلے ہوئی ، عمران خان ازبکستان اس مہینے جارہے ہیں۔
وفاقی وزیر داخلہ نے کہا کہ ڈپلومیٹک پاکستان پر فری ویزہ اور آن ارائیول چند روز کا ویزہ ملے گا ، ایف آئی اے میں بارہ سو نوکریاں نکلی تھیں ، 509 نوکریاں مزید لینے کیلئے فنانس منسٹری سے ریکوئسٹ کی ہے ، چمن اور چورخم مکمل طورپر انٹری کیلئے ڈیوٹی پر موجود ہیں ، چمن کو بھی تیس تاریخ الیکٹرانک بنا دیا جائے گا۔
شیخ رشید احمد نے کہا کہ آج ڈی جی ایف آئی اے کو کہا گیا ہے کہ جو لوگ بارہ بارہ سال ایک جگہ پر بیٹھے ہوئے ہیں ان کو تبدیل کریں گے ، تمام ائیرپورٹس پر سی پیک کیلئے الگ کاؤنٹر بنائیں گے ، لاہور دھماکے میں را ملوث ہے۔
انہوں نے کہا کہ کراچی میں بھی کچھ لوگ ہم نے پکڑے ہوئے ہیں ادارے فیصلہ کریں گے کب ان کو منظر عام پر لانا ہے ، ہندوستان نے دل سے ہمیں تسلیم نہیں کیا اور وہ ہروقت پاکستان کو نقصان پہنچانے کے درپے ہے ، ملک کی وزارت داخلہ اپنی عظیم افواج کے ساتھ پوری طرح اپنے ملکی بارڈرز پر نظر رکھے ہوئے ہیں۔
وفاقی وزیر داخلہ نے کہا کہ ہم باخبر ہیں، بھارت کیخلاف وزارت خارجہ ثبوت دنیا کے سامنے رکھے گی ، ہماری پوری خواہش ہے افغانستان کے لوگ مل کر اپنے مسائل حل کریں ، ٹی ایل پی کا کیس سن لیا گیا ہے، اگلی کابینہ میٹنگ میں اس پر فیصلہ کریں گے۔
شیخ رشید احمد نے کہا کہ یہاں پہلے ہی تیس چالیس لاکھ افغان مہاجرین موجود ہیں ، جیسے جیسے حالات بنیں گے ان پر فیصلہ کریں گے ، ساری قوم پاکستان کی سلامتی میں پاک فوج کے ساتھ کھڑی ہے ، پی ڈی ایم ٹھس ہے، دو سال پہلے کہا تھا مریم اور شہباز کی سیاست مختلف ہے۔
انہوں نے کہا کہ کشمیر کے الیکشن کے بعد پی ڈی ایم مزید اپنے سائز میں آجائے گی ، لاہور دھماکے کے حوالے سے سیکورٹی ایجنسیز نے بارہ گھنٹوں کے اندر ملزم پکڑے وہ تعریف کے قابل ہیں۔
