وفاقی وزیر اسد عمر نے کہا کہ اسلام آباد کو ہرا بھرا رکھنے کے لیے باقاعدہ ہوم ورک کرنے کی ضرورت ہے۔
تفصیلات کے مطابق وفاقی وزیر اسد عمر کی زیرصدارت ہرا بھرا اسلام آباد میں مہم کا پہلا اجلاس ہوا جس میں ایم این اے راجہ خرم نواز، وزیر اعظم کے مشیر برائے سی ڈی اے علی نواز اعوان اور سی ڈی اے ماحولیات ڈیپارٹمنٹ کے افسران نے شرکت کی۔
ذرائع کے مطابق اجلاس میں اسلام آباد کے لیے موزوترین مقامات ، پارکس ، سیکٹرز اور درختوں کے انتخاب پر تفصیلاً تبادلہ خیال ہوا۔
اسد عمر نے کہا کہ وزیر اعظم عمران خان نے ’’نیا پاکستان‘‘ بنانے کیلئے سب سے پہلے ماحولیاتی آلودگی سے نجات حاصل کرنے کا عزم کیا تھا، اسکو پایہ تکمیل تک پہنچانا ہماری اولین ترجیحات میں شامل ہے۔
واضح رہے کہ اسدعمر نے درخت لگاؤ مہم میں اسلام آباد کی ٹائیگر فورس، یوسیز اور فلاحی تنظیموں کو بھی شامل کرنے کی ہدایت کی ہے۔
انہوں نے کہا کہ اسلام آباد کو ”سر سبز“ بنانے کے لیے ماضی میں ”ناموافق“ اور ”غیر موزوں“ درخت لگائے گئے جو پولن الرجی کا باعث بنے، جلد ہی آغاز کی جانے والی درخت لگاؤ مہم میں ایسے درختوں کا انتخاب کیا جائے گا جو اسلام آباد میں پولن الرجی کا باعث نہ بنیں گے۔
