امریکی صدر جو بائیڈن نے اپنے شہریوں کو خبردار کیا ہے کہ کورونا ویکسین نہ لگوانے والے افراد کو موسم سرما میں بیماریوں اور موت کا سامنا کرنا پڑ سکتا ہے۔
صدر جو بائیڈن امریکی شہریوں پر زور دے رہے ہیں کہ وہ اومیکرون وائرس کے تیزی سے پھیلاؤ کے پیش نظر کورونا ویکسین کی تیسری ڈوز بھی لگوائیں ۔
انہوں نے کہا کہ ویکسین کا کورس مکمل کرنے والے افراد میں وائرس کی شدت کے باوجود موت کا خطرہ کم ہوجائے گا۔
جو بائیڈن کی اپیل ایسے وقت میں سامنے آئی ہے جب سات ممالک کے گروپ نے اومیکرون کو صحت عامہ کے لیے سب سے بڑا خطرہ قرار دیا ہے اور اقوام متحدہ کے سربراہ نے عالمی ویکسین کی عدم مساوات کو ختم کرنے کا مطالبہ کیا ہے۔
انہوں نے کہا کہ اومیکرون وائرس ممکنہ حد تک اس تیزی سے نہیں پھیلا جس کا گمان کیا جارہا تھا تاہم اب یہ امریکا میں بھی پھیلنا شروع ہو گیا ہے اور اس میں اضافہ متوقع ہے۔
امریکہ میں حالیہ ہفتوں میں روزانہ کورونا کیسز کی اوسط تعداد میں 30 فیصد اضافہ ہوا ہے۔ یکم دسمبر کو روزانہ کی تعداد 86,000 تھی لیکن 14 دسمبر کو اس کی تعداد 117,000 تک پہنچ گئی ہے۔
امریکا نے اومیکرون وائرس سے متاثرہ 8 افریقی ممالک کیلئے پروازیں بند کر دی ہیں۔
ماہرین غیر یقینی صورتحال کا شکار ہیں کہ کورونا(اومیکرون )کی انتہائی تبدیل شدہ شکل کتنی خطرناک ہے لیکن ابتدائی اعداد و شمار سے پتہ چلتا ہے کہ یہ ویکسین کے لیے زیادہ مزاحم ہو سکتا ہے اور ڈیلٹا وائرس سے زیادہ تیزی سے منتقل ہو سکتا ہے۔
تاہم ماہرین ابتدائی طور پر اس بات پر بھی متفق ہیں کہ اعداد و شمار کے مطابق اومیکرون کی علامات ڈیلٹا کے مقابلے میں زیادہ ہلکی ہوتی ہیں۔
