وزیراعظم عمران خان سرکاری دعوت پر دو روزہ دورہ روس پر جائیں گے۔ وزیراعظم عمران خان 23 اور 24 فروری کو روس کا دورہ کریں گے۔ وزیر اعظم کے ہمراہ کابینہ ارکان سمیت اعلیٰ سطحی وفد بھی جائے گا۔ دورے کے دوران وزیراعظم اور صدر پیوٹن کے درمیان ملاقات ہو گی، ملاقات میں دوطرفہ تعلقات اور باہمی دلچسپی کے علاقائی امور پر تبادلہ خیال کیا جائے گا۔
وزیراعظم دوسری جنگ عظیم میں جاں بحق ہونے والے فوجی کے مقبرے پر پھولوں کی چادر چڑھائیں گے، وزیراعظم ماسکو میں مرکزی مسجد کا دورہ بھی کریں گے۔
خیال رہے کہ وزیر اعظم عمران خان اور صدر پیوٹن کے درمیان تین بار بات چیت ہو چکی ہے، وزیراعظم نے صدر پیوٹن کو جلد از جلد پاکستان کا دورہ کرنے کی دعوت بھی دی۔ روسی وزیر خارجہ نے 7 سال کے بعد گزشتہ سال اپریل میں پاکستان کا دورہ کیا تھا۔
پاکستان اور روس کے وزیر خارجہ کی ملاقات گزشتہ سال ستمبر میں ایس سی او کونسل آف ہیڈز آف سٹیٹ کے موقع پر ہوئی۔
