لاہور: (ویب ڈیسک) انگلینڈ کی دورہ پاکستان کے دوران ٹی ٹونٹی سیریز 15 ستمبر سے شروع ہونےکا امکان ہے۔
پاکستان کرکٹ بورڈ (پی سی بی) اور انگلینڈ اینڈ ویلز کرکٹ بورڈ (ای سی بی) کی جانب سے انگلینڈ کرکٹ ٹیم کے آئندہ دورہ پاکستان کی تفصیلات تیار کرنے کے لیے ایک خصوصی کمیٹی قائم کر دی گئی ہے۔ دونوں بورڈز ایک ساتھ مل کر مختلف امور پر بات چیت کریں گے جن میں ٹور شیڈول اور پوری سیریز میں سکیورٹی انتظامات شامل ہیں۔
توقع ہے کہ یہ دورہ 15 ستمبر سے شروع ہوگا۔ انگلینڈ 7 میچوں کی ٹی ٹونٹی انٹرنیشنل سیریز میں پاکستان کے خلاف آمنے سامنے آئے گا۔
ابتدائی طور پر سیریز میں پانچ ٹی ٹونٹی انٹرنیشنل شیڈول تھے لیکن انگلش کرکٹ بورڈ کے سابق چیف ایگزیکٹیو ٹام ہیریسن نے گزشتہ سال دورہ پاکستان کی منسوخی کے لیے مزید دو ٹی ٹونٹی میچز شامل کرنے کا اعلان کیا۔
انگلینڈ کی ٹیم اس سال کے آخر میں 3 میچوں کی ٹیسٹ سیریز کھیلنے کے لیے آئی سی سی T20 ورلڈ کپ کے اختتام کے بعد دوبارہ پاکستان کا دورہ کرے گی۔
پی سی بی کے چیئرمین رمیز راجہ نے گزشتہ ہفتے کہا تھا کہ بورڈ جلد ہی انگلینڈ کے دورے کی حتمی تاریخوں کا اعلان کرے گا جس میں دیگر تفصیلات جیسے مقام، وقت اور ٹکٹوں کی قیمتوں کا تعین بھی کیا جائے گا۔ سیریز کے لیے میچز لاہور، کراچی ، راولپنڈی اور ملتان میں کروانے پرغور کیا جا رہا ہے۔
انگلینڈ کی پاکستان سے ٹی ٹونٹی سیریز 15 ستمبر سے شروع ہونیکا امکان
