امریکا : (ویب ڈیسک) امریکا میں 8 نومبر کو ہونے والے وسط مدتی انتخابات کیلئے انتخابی مہم جاری ہے، حکمران جماعت ڈیموکریٹس اور حزب اختلاف ری پبلکنز کے درمیان 6 ریاستوں میں سخت مقابلہ متوقع ہے۔
وسط مدتی انتخابات کیلئے کئی ریاستوں میں پہلے ہی رکارڈ تعداد میں لوگ پوسٹل بیلٹ یا ای میل کے ذریعے اپنا ووٹ ڈال چکے ہیں۔
مڈٹرم الیکشنز میں ایوان نمائندگان کی تمام یعنی 435 نشستوں پرچناؤ ہوگا جبکہ سو رکنی سینیٹ کی ایک تہائی یعنی 35 نشستوں پر الیکشن ہوگا۔
50 ریاستوں اور ڈسٹرکٹ آف کولمبیا پر مشتمل امریکا میں 36 گورنروں کو بھی منتخب کیا جائے گا۔
اس وقت 27 ریاستوں میں ری پبلکنز جبکہ 23 پر ڈیموکریٹک گورنر براجمان ہیں، ساتھ ہی کونسلر، میئر، اٹارنی، جج اور بورڈ اراکین سمیت درجنوں دیگر اہم عہدوں پر بھی شخصیات منتخب کی جائیں گی۔
اہم ترین معرکے 6 ریاستوں ایریزونا، جارجیا، مشی گن، پنسلوینیا، وسکونسن اور نیواڈا میں متوقع ہیں۔
حکمران ڈیموکریٹس کو دونوں ایوانوں میں برتری حاصل ہے تاہم کوئی ایک ایوان بھی ہاتھ سے گیا تو صدر بائیڈن کیلئے قانون سازی مشکل ہوجائے گی۔
ووٹرز کیلئے اہم ترین ایشوز میں مہنگائی، اسقاط حمل کے حقوق، تعلیم اور ماحولیاتی آلودگی پر قابو پانے کی پالیسیاں شامل ہیں۔
سابق صدر ڈونلڈ ٹرمپ کیلئے بھی مڈٹرم بہت اہم ہے، دوبارہ صدارت کا امیدوار بننے کے خواہش مند ڈونلڈ ٹرمپ نے اس الیکشن میں کچھ ایسے امیدواروں کی توثیق کی ہے جو ری پبلکنز کو پسند نہیں۔
ایسی شخصیات کو عوام نے منتخب کرلیا تو ری پبلکن پارٹی پر ڈونلڈ ٹرمپ کی نہ صرف گرفت مضبوط ہوگی بلکہ ٹرمپ کے دوبارہ صدارتی امیدوار بننے کا امکان بھی بڑھ جائے گا۔
امریکا میں وسط مدتی انتخابات، 6 ریاستوں میں اہم معرکے متوقع
