اسلام آباد: (ویب ڈیسک) پشاور دھماکے میں ملوث مبینہ حملہ آور کے جوتے اور ہیلمٹ بھی مل گیا۔
پشاور پولیس لائنز دھماکے کی تحقیقات میں مزید پیش رفت سامنے آگئی۔ مبینہ خودکش حملہ آور کا ہیلمٹ اور جوتے مل گئے۔ مبینہ حملہ آور کے جسمانی اعضاء بھی ملبے سے برآمد ہوئے۔
پولیس حکام کے مطابق ملبے سے ملنے والی اشیا اور جسمانی اعضا سے تحقیقات میں پیش رفت ہو گی۔ اس سےقبل مبینہ خودکش حملہ آورکی سی سی ٹی وی فوٹیج سامنے آ ئی تھی ۔
فوٹیج میں دیکھا جا سکتا ہے کہ مبینہ حملہ آور پولیس وردی میں بائیک پرسوار ہوکرآیا اورموٹرسائیکل کوگھسیٹ کراندرلے گیا۔ مبینہ خودکش حملہ آور نے بائیک پارکنگ ایریا میں کھڑی کی ، جس کے بعد مبینہ حملہ آور پارکنگ ایریا سے پیدل مسجد تک پہنچا۔
دوسری جانب دھماکے کا شکار ہونے والی پولیس لائنز مسجد میں آج نماز جمعہ اداکی گئی۔ نماز جمعہ میں پولیس کے اعلیٰ حکام اور جوانوں نے شرکت کی۔دھماکے میں شہید ہونے والے امام مسجد کے بھائی نے نماز جمعہ کی امامت کی۔
نمازجمعہ کے لیے بڑی تعداد میں نمازیوں نے شرکت کی۔ نماز کے لیےمسجد کے باہر بھی صف بندی کی گئی۔نماز جمعہ کے موقع پر سخت سیکیورٹی اقدامات کیے گئے۔
واضح رہے کہ 30 جنوری کو پشاور پولیس لائن کی مسجد میں خودکش دھماکہ ہوا تھا جس میں اب تک 101 افراد شہید ہوچکے ہیں جبکہ 200 کے قریب افراد زخمی ہوئے تھے۔
پشاور دھماکہ: حملہ آور کا جوتا اور ہیلمٹ بھی مل گیا
