عمران خان نے خاندانوں کو لڑایا ، بات کرنے کا سلیقہ اور تہذیب چھین لی: مریم نواز

لاہور: (ویب ڈیسک) پاکستان مسلم لیگ (ن) کی سینئرنائب صدر اور چیف آرگنائزر مریم نوازشریف نے سابق وزیراعظم کو تنقید کا نشانہ بناتے ہوئے کہا کہ عمران خان نے گھروں، دوستوں اور خاندانوں کو لڑایا، بات کرنے کا سلیقہ اور تہذیب چھین لی ۔
پاکستان مسلم لیگ (ن) کی سینئر نائب صدر اور چیف آرگنائزر مریم نوازشریف نے لاہور میں منعقدہ سوشل میڈیا ٹیم اجلاس کی صدارت کرتے ہوئے کہا کہ ملک بھر سے پڑھے لکھے، مہذب اور روشن دماغ نوجوانوں کو سوشل میڈیا کو گند گی سے پاک کرنے میں کردار ادا کرنا ہوگا، نوجوان سوشل میڈیا کو مثبت رویوں اور تعمیری سوچ کے فروغ کے لئے استعمال کریں ۔
انہوں نےنوجوانوں سے کہا کہ سیاہ دور میں آپ کی جرات وبہادری قابل فخر ہے، نوجوان حقائق اور سچائی کے فروغ کا ذریعہ بنیں اور جھوٹ پھیلانے والوں کو سچائی کا آئینہ دکھائیں۔
مریم نواز کا کہنا تھا کہ گزشتہ چار سال کے سیاہ آمرانہ دور میں بھائی کو بھائی سے لڑایا گیا ، ذہنی مریض نے وزیراعظم کی کرسی پر بیٹھ کر جھوٹ، گالی اور گولی کو قومی کلچر بنا دیا، نوجوان معاشرے میں تحمل، اخلاق بھائی چارے کے جذبے ابھاریں، مکالمے کا جمہوری اور اسلامی طرز تکلم اپنائیں۔
سینئر نائب صدر مریم نواز نے کہا کہ قائد نوازشریف اور مسلم لیگ (ن) شرافت برداشت اور اخلاقی قدروں پر یقین رکھتے ہیں ، معاشرے سے تقسیم در تقسیم کو ختم کرنا اور اتحاد کے جذبوں کو بڑھانا ہے۔
ان کا مزید کہنا تھا کہ سائبر سپیس پر آپ ملک اور قوم کے مفاد کی جنگ لڑیں ، اختلاف کرنے والے کو دشمن نہ سمجھیں، آپ رضاکارانہ جذبے سے کام کرتے ہیں ، آپ پر فخر ہے۔
مریم نواز نے سوشل میڈیا ٹیم کے نوجوانوں کے جذبے کی تعریف کی اور نوجوانوں کو کیوآرکوڈ پر سوشل میڈیا ٹیم کا حصہ بننے کی دعوت بھی دی ۔