اسلام آباد: (ویب ڈیسک) پاکستان مسلم لیگ (ن) کے رہنما طارق فضل چودھری نے کہا ہے کہ عمران خان سیاسی طور پر ناپختہ ہیں، پی ٹی آئی دباؤ کے ذریعے الیکشن کمیشن سے اپنے حق میں فیصلہ لینا چاہتی ہے۔
اپنے ایک بیان میں لیگی رہنما طارق فضل چودھری نے کہا کہ الیکشن کمیشن آف پاکستان ایک آئینی ادارہ ہے، صاف اور شفاف الیکشن کروانا اس ادارے کی آئینی ذمہ داری ہے، الیکشن کمیشن اپنی آئینی ذمہ داریاں پوری کر رہا ہے۔
انہوں نے کہا کہ جہاں پی ٹی آئی کے حق میں فیصلہ ہو الیکشن کمیشن اچھا ہوتا ہے، پاکستان کے عوام سوئے ہوئے نہیں ہیں، الیکشن کمیشن آف پاکستان اس طرح کی دھونس دھمکیوں سے نہ پہلے ڈرا ہے نہ اب ڈرے گا۔
طارق فضل چودھری نے کہا کہ آج ملک میں ہر طرف بحران ہے، ملک میں افراتفری کی کیفیت ہے، جب نواز شریف وزیراعظم تھے پوری دنیا ساتھ کھڑی تھی، آج تحریک انصاف نے ملک میں شر پھیلایا ہوا ہے، مالیاتی ادارے بات کرنے سے کتراتے ہیں۔
