اسلام آباد: (ویب ڈیسک) فضائی مشق سپیئرز آف وکٹری 2023ء شاہ عبدالعزیز ایئر بیس پر اختتام پذیر ہو گئی۔
پاک فضائیہ کے دستے نے فضائی مشق سپیئرز آف وکٹری 2023ء میں حصہ لیا، مشق میں شامل ہونے والا پاک فضائیہ کا دستہ جے ایف-17 تھنڈر اور ایف-16 طیاروں پر مشتمل تھا، مشق میں پاک فضائیہ اور دوست ممالک کے جدید لڑاکا طیاروں اور معاون عملے نے شرکت کی۔
ائیر مارشل عبدالمعید خان، ڈپٹی چیف آف دی ائیر اسٹاف نے مشق کی اختتامی تقریب کا معائنہ کیا، انہوں نے مشق کو کامیاب بنانے پر پاک فضائیہ کے دستے کی کاوشوں کو سراہا، ایئر مارشل عبدالمعید خان نے ایئر اینڈ گراؤنڈ کریو کے ساتھ بات چیت بھی کی۔
اس موقع پر گفتگو کرتے ہوئے عبدالمعید خان نے کہا کہ فضائی جنگ کے نئے ابھرتے تصورات پاکستان اور دوست ممالک کے درمیان بہتر شراکت داری کے متقاضی ہیں، عالمی سلامتی کے اس ماحول میں بین الاقوامی اور علاقائی تزویراتی صورتحال گہری تبدیلیوں سے گزر رہی ہے۔
انہوں نے کہا کہ اس طرح کی مشقیں مشترکہ چیلنجز کے مقابلہ میں باہمی تعاون کو بڑھانے کا موقع فراہم کرتی ہیں، مشق کا یہ تیسرا ورژن فروری کے پہلے ہفتے میں سعودی عرب کے مشرقی علاقے میں شروع ہوا۔
ترجمان کے مطابق مشق میں سعودی عرب سمیت بحرین، یونان، اردن، پاکستان، قطر، برطانیہ اور امریکہ کی فضائی افواج نے شرکت کی، مشق کا مقصد حصہ لینے والے ممالک کے ساتھ باہمی تعاون کو فروغ دینے کا موقع فراہم کرنا تھا۔
مشق نے خطرات کے خلاف حکمت عملیوں کی تشکیل و توثیق اور کمبیٹ اینڈ کمبیٹ سپورٹ اثاثہ جات کے استعمال کے لئے بہترین پلیٹ فارم فراہم کیا، مشق میں بڑی تعداد میں جارحانہ اور دفاعی پیچیدگیوں کی حامل تربیتی پروازیں شامل تھیں۔
پروازوں میں الیکٹرانک وارفیئر، فضائی دفاعی سسٹمز اور دشمن کی صلاحیتوں کو سیمولیٹ کرنے والے جارحانہ لڑاکا طیاروں کو بھی شامل کیا گیا۔
مشق نے آپریشنل صلاحیتوں، جہازوں کی فضائی مینوورنگ، مشترکہ کارروائی اور دوست ممالک کے درمیان اتحاد سازی اور ائیر اینڈ گراؤنڈ عملے کی جنگی تیاریوں کو بہتر بنانے میں کلیدی کردار ادا کیا۔
فضائی مشق سپیئرز آف وکٹری 2023ء شاہ عبدالعزیز ایئر بیس پر اختتام پذیر
