بالی ووڈ کے معروف اداکار منوج باجپائی اور سینیئر اداکارہ شرمیلا ٹیگور کی فلم ‘گل موہر’ نے 70ویں نیشنل فلم ایوارڈز میں بہترین ہندی فلم کا ایوارڈ اپنے نام کرلیا۔
میڈیا رپورٹس کے مطابق بھارت کے اطلاعات و نشریات کی وزارت نے جمعے کو نئی دہلی میں ایک پریس کانفرنس میں 70ویں نیشل فلم ایوارڈز کے فاتحین کا اعلان کیا۔
70ویں نیشنل فلم ایوارڈز کے فاتحین میں منوج باجپائی اور شرمیلا ٹیگور کی فلم ‘گل موہر’ بھی شامل ہے جسے بہترین ہندی فلم کے ایوارڈ سے نوازا گیا ہے۔
بھارتی میڈیا نے اپنی رپورٹ میں بتایا کہ 13 سال بعد اداکاری کی دنیا میں واپسی کرنے والی سینیئر اداکارہ شرمیلا ٹیگور نے فلم ‘گل موہر’ میں ہم جنس پرستوں کا کردار ادا کیا۔
دوسری جانب منوج باجپائی نے فلم میں شرمیلا ٹیگور کے بیٹے کا کردار نبھایا جو وہ گود لیتی ہیں جبکہ فلم کی دیگر کاسٹ میں سورج شرما، امول پالیکر، کاویری سیٹھ اور سمرن شامل تھیں۔
راہول وی چٹیلا کی ہدایتکاری میں بننے والی فلم ‘گل موہر’ کو اسٹار اسٹوڈیوز اور چاک بورڈ انٹرٹینمنٹ کی جانب سے پروڈیوس کیا گیا تھا جبکہ یہ فلم سال 2023 میں 3 مارچ کو ریلیز ہوئی تھی۔
