بالی وڈ کے کنگ خان، شاہ رخ خان، نے اپنی 59ویں سالگرہ منفرد انداز میں منائی۔ شاہ رخ کی ٹیم نے ان پولیس اہلکاروں کو کھانے کے ڈبے فراہم کیے جو ان کے گھر ’منت‘ کے باہر مداحوں کی بھیڑ کو کنٹرول کرنے کے لیے تعینات تھے۔
سوشل میڈیا پر وائرل تصاویر میں دیکھا جا سکتا ہے کہ پولیس اہلکار شاہ رخ خان کی جانب سے بھیجے گئے کھانے کے پیکٹ تقسیم کر رہے ہیں۔
ایک مداح نے X (سابقہ ٹویٹر) پر ویڈیو شیئر کرتے ہوئے کہا، “کنگ خان کی جانب سے پولیس کے لیے کھانے کے ڈبے، وہ واقعی ’کنگ‘ ہیں۔”
شاہ رخ خان نے اپنی سالگرہ اہل خانہ کے ساتھ کیک کاٹ کر منائی اور پھر ایک خاص ایونٹ میں اپنے مداحوں سے ملاقات بھی کی۔
اس موقع پر انہوں نے کہا، “میں آج دیر سے جاگا کیونکہ رات دیر تک ڈنر چل رہا تھا۔ میرے چھوٹے بچے کو آئی پیڈ کی وجہ سے کچھ پریشانیاں تھیں اور میری بیٹی کو اپنے کپڑوں کی فٹنگ میں مسئلہ تھا۔”
شاہ رخ کی اگلی فلم ’کنگ‘ ہوگی جس میں وہ اپنی بیٹی سوہانہ خان کے ساتھ جلوہ گر ہوں گے۔ یہ فلم اگلے سال پروڈکشن میں آئے گی اور اس کی ریلیز عید 2026 پر متوقع ہے۔
