ایچ بی ایل پی ایس ایل اور شائقین کا رشتہ مزید مضبوط کیا جائے گا، سیزن 10 میں فینز چوائس ایوارڈز متعارف کرانے کا فیصلہ کیا گیا ہے، شائقین اپنے ووٹس سے گذشتہ ایڈیشنز کے بہترین کھلاڑیوں کا انتخاب کریں گے، 6 کیٹیگریز میں ووٹ دیے جائیں گے۔
تفصیلات کے مطابق ایچ بی ایل پاکستان سپر لیگ اور شائقین کا رشتہ مزید مضبوط کرنے کا فیصلہ کیا گیا ہے، اس مقصد کیلیے ایچ بی ایل پاکستان سپر لیگ 10 میں فینز چوائس ایوارڈز کو متعارف کرایا جائے گا۔
شائقین اپنے ووٹ کے ذریعے گزشتہ ایڈیشنز میں حصہ لینے والے بہترین کھلاڑیوں کا ان کی پرفارمنس کی بنیاد پر انتخاب کریں گے۔ 6 کیٹگریز میں ایوارڈز دیئے جائیں گے جن میں بہترین بیٹر،بہترین بولر، بہترین آل راؤنڈر، سب سے قیمتی کھلاڑی، بہترین انفرادی بولنگ پرفارمنس اور بہترین انفرادی بیٹنگ پرفارمنس شامل ہیں۔
سب سے زیادہ ووٹ حاصل کرنے والے کھلاڑیوں کے ناموں کا اعلان 11 جنوری کو پی ایس ایل ڈرافٹ کی تقریب میں کیا جائے گا۔
پی ایس ایل کے چیف ایگزیکٹیو سلمان نصیر کہتے ہیں کہ پرجوش شائقین کو ایچ بی ایل پی ایس ایل کے اس ایوارڈز میں شریک کرنے مقصد سپر لیگ سے ان کی جذباتی وابستگی کا اعتراف ہے، پی ایس ایل کا کامیاب سفر ان پرجوش شائقین کے بغیر ممکن نہیں ہے۔
یاد رہے کہ اس بار پی ایس ایل کی ڈرافٹ تقریب گوادر میں سجائی جائے گی۔ شائقین کرکٹ پاکستان کی اپنی لیگ کا بے چینی سے انتظار کررہے ہیں۔
