بھارت میں کرسمس کے موقع پر ہندو انتہا پسندوں نے ڈیلیوری رائیڈر کو سانتا کلاز کا کاسٹیوم اتارنے پر مجبور کردیا۔
بھارتی میڈیا کے مطابق بھارتی ریاست مدھیہ پردیش کے شہر اندور میں کھانے کی کمپنی کا رائیڈر کرسمس کے موقع پر سانتا کلاز کا کاسٹیوم پہن کر ڈیلیوری کے لیے جا رہا تھا۔ ہندوانتہا پسند تنظیم ہندو جاگرن منچ کے غنڈوں نے رائیڈر کا راستہ روک کر اس سے سوال اور جواب کیے اور دھمکیاں دیں۔ رائیڈر نے انتہاپسندوں کو بتایا کہ کمپنی نے یہ لباس پہننے کو کہا ہے جس پر ہندو انتہاپسندوں نے رائیڈر کو سانتا کلاز کا کاسٹیوم اتارنے پر مجبور کیا۔
انتہاپسندوں کی رائیڈر کو دھمکیاں دینے اور زبردستی سانتا کلاز کا کاسٹیوم اتروانے کی ویڈیوز سوشل میڈیا پر وائرل ہوگئی۔ سوشل میڈیا صارفین نے رائیڈر کے صبر اور برداشت کی تعریف کرتے ہوئے ہندو انتہاپسند تنظیم اور اس کے کارکنوں کو شدید تنقید کا نشانہ بنایا۔ اتنظامیہ نے اب تک کسی ہندو پسند کے خلاف کارروائی نہیں کی۔
