بھارت کی ریاست اتر پردیش میں اپنی نوعیت کا ایک انوکھا واقعہ پیش آیا جہاں ایک شہری نے یوٹیوب ویڈیو دیکھ کر اپنی سرجری خود کر ڈالی۔
بھارتی میڈیا کی رپورٹس کے مطابق ہسپتال اور ڈاکٹروں کے چکر کاٹنے والے شہری کو پیٹ درد کے علاج سے افاقہ نہ ہوا تو یوٹیوب ویڈیوز دیکھ کر خود ہی اپنا پیٹ کاٹ کر آپریشن کی ناکام کوشش کی۔
آپریشن کی ناکام کوشش کرنے والے 32 سالہ راجا بابو کو تشویشناک حالت میں ہسپتال منتقل کر دیا گیا ہے۔
اتر پردیش کے ضلع متھورا سے تعلق رکھنے والا راجا بابو کئی دنوں سے شدید پیٹ درد میں مبتلا تھا اور متعدد ڈاکٹروں سے علاج کے باوجود آرام نہ ملنے پر اُس نے خود اپنا آپریشن کرنے کا فیصلہ کیا۔
راجا بابو نے یوٹیوب پر مختلف ویڈیوز دیکھنے کے بعد ایک میڈیکل اسٹور سے دوائیں، آلاتِ جراحی، ٹانکے لگانے کا سامان اور سُن کرنے کے انجیکشن خریدے۔
بدھ کی صبح راجا بابو نے اپنے کمرے میں آپریشن شروع کیا لیکن کچھ دیر بعد انجیکشن کا اثر ختم ہوتے ہی شدید تکلیف میں مبتلا ہو گیا اور چیخنے لگا۔
چیخ و پکار سُن کر اہل خانہ کو واقعے کا علم ہوا جس کے بعد اُسے فوراً ہسپتال منتقل کیا گیا۔
واقعے کی تصدیق کرتے ہوئے راجا بابو کے بھتیجے راہول نے بتایا کہ اس کے چچا نے یوٹیوب ویڈیوز دیکھ کر خود آپریشن کرنے کی کوشش کی۔
راہول نے مزید بتایا کہ ’18 سال قبل راجا بابو کی اپنڈکس کی سرجری ہو چکی ہے، لیکن حالیہ دنوں میں وہ دوبارہ پیٹ درد میں مبتلا تھے’۔
راہول کے مطابق ‘جب ڈاکٹروں سے علاج کے باوجود آرام نہ آیا تو چچا نے خود اپنا علاج کرنے کا فیصلہ کیا، تاہم حالت بگڑنے پر انہیں فوری طور پر آگارہ کے ہسپتال منتقل کردیا گیا’۔
