جے یو آئی کے سربراہ مولانا فضل الرحمن نے کہا ہے کہ فلسطین کے عوام آزادی اور اپنی سرزمین کے دفاع کیلیے قربانیاں دے رہے ہیں، انکے جذبے اور استقامت کو سلام پیش کرتا ہوں۔
اہلِ فلسطین کو یہ پیغام دینا چاہتے ہیں کہ چاہے دنیا ان کے ساتھ ہو یا نہ ہو، پاکستانی عوام پوری طرح ان کے شانہ بشانہ کھڑے ہیں۔
مینار پاکستان پر قومی کانفرنس یکجہتی فلسطین سے خطاب کرتے ہوئے انھوں نے کہا اقوام متحدہ اور انسانی حقوق کی تنظیموں کو بتانا چاہتے ہیں کہ بچوں کا قتل اگر "دفاعی جنگ” کہلائے، تو یہ سراسر ناانصافی ہے۔
اسرائیلی قیادت خصوصاً نیتن یاہو جنگی مجرم ہے اور عالمی عدالت انصاف کو اسے سزا دینی چاہئے، جس طرح ماضی میں صدام حسین کو چند افراد کے قتل پر پھانسی دی گئی تھی۔
آج دنیا کے قوانین صرف طاقتور کے مفاد میں کام کرتے ہیں اور انصاف کے نام پر طاقت کا راج ہے۔
انہوں نے کہا پہلگام میں نہتے سیاحوں پر حملہ افسوسناک ہے، لیکن جب اہلِ غزہ پر ظلم ہوتا ہے تو بھارت اسرائیل کے ساتھ کھڑا ہوتا ہے۔ بھارت ایک عرصے سے مسلمانوں کا دشمن ہے اور غزہ پر بمباری میں اسرائیل کا ساتھ دے رہا ہے۔
