ایپل نے ایمیزون کے ساتھ سیٹلائٹ کنیکٹیویٹی کے حوالے سے ایک اہم معاہدہ کیا ہے، جس کے تحت ایمیزون اپنی نچلے زمینی مدار میں موجود سیٹلائٹ سروس کو مزید بہتر اور وسیع کرے گا۔
اس معاہدے کے مطابق ایمیزون اب گلوبل اسٹار کمپنی کو کنٹرول کرے گا، جو اس وقت ایپل آئی فون اور ایپل واچ میں ہنگامی اور سیٹلائٹ کنیکٹیویٹی کی سہولت فراہم کر رہی ہے۔
ایمیزون کئی سالوں سے اپنا سیٹلائٹ نیٹ ورک “ایمیزون لیو” تیار کر رہا ہے، جس کا مقصد دور دراز اور کم سہولت والے علاقوں میں انٹرنیٹ کی سہولت بہتر بنانا اور اسٹار لنک جیسے نیٹ ورکس کا مقابلہ کرنا ہے۔
اگرچہ ایمیزون کی یہ سروس ابھی بڑے پیمانے پر شروع نہیں ہوئی، تاہم اس معاہدے کے بعد کمپنی کو عالمی سیٹلائٹ کمیونیکیشن مارکیٹ میں اپنی پوزیشن مضبوط کرنے میں مدد ملے گی۔
ایپل صارفین کے لیے سروس جاری رہے گی
اس معاہدے کے تحت ایپل کے موجودہ اور مستقبل کے آلات میں سیٹلائٹ سروس پہلے کی طرح جاری رہے گی، اور اب یہ ایمیزون کے نئے نظام کے ساتھ مزید مربوط ہو جائے گی۔
ایمیزون کے ایک اعلیٰ عہدیدار پانوس پینے نے کہا ہے کہ کمپنی ایپل صارفین کے لیے بہتر رابطے کی سہولت فراہم کرنے کے لیے پرعزم ہے اور دنیا بھر میں نیٹ ورک کی رسائی بڑھانے پر کام کرے گی۔
ایپل کی پہلے سے موجود سروس
ایپل نے 2022 میں آئی فون 14 کے ذریعے پہلی بار سیٹلائٹ کنیکٹیویٹی متعارف کرائی تھی۔ اس مقصد کے لیے کمپنی نے گلوبل اسٹار کے ساتھ شراکت کی اور اس میں سرمایہ کاری بھی کی۔
رپورٹس کے مطابق ایپل نے اس سے قبل اسٹار لنک کے ساتھ براہ راست معاہدہ نہیں کیا تھا۔
ایمیزون کا نیا منصوبہ
ایمیزون کے چیف ایگزیکٹو آفیسر اینڈی جیسی کے مطابق “ایمیزون لیو” سروس دو ہزار چھبیس کے وسط میں شروع ہونے کی توقع ہے، جبکہ آنے والے برسوں میں ہزاروں اضافی سیٹلائٹس خلا میں بھیجے جائیں گے۔
ہوائی جہازوں کے لیے انٹرنیٹ
ایمیزون نے ہوائی جہازوں کے لیے بھی نیا نظام متعارف کرایا ہے جو انتہائی تیز انٹرنیٹ فراہم کرے گا۔ ڈیلٹا ایئر لائنز نے اس سروس کے لیے معاہدہ کیا ہے اور یہ سہولت دو ہزار اٹھائیس میں شروع ہونے کی توقع ہے۔
اس وقت اسٹار لنک بھی کئی ایئر لائنز کو دورانِ پرواز انٹرنیٹ کی سہولت فراہم کر رہا ہے، جن میں قطر ایئرویز اور برٹش ایئرویز شامل ہیں۔
