بنگلورو: بھارت کے ٹیکنالوجی حب بنگلورو کے مضافاتی علاقے دیوناہلی میں ایک ایسی روح فرسا واردات سامنے آئی ہے جس نے سننے والوں کے رونگٹے کھڑے کر دیے۔ ایک مقامی کمپنی میں کام کرنے والی خاتون نے مبینہ طور پر بیت الخلاء میں بچے کو جنم دینے کے بعد اسے بے دردی سے موت کے گھاٹ اتار دیا اور لاش کو کموڈ میں بہا دیا ۔
پولیس ذرائع کے مطابق یہ واقعہ ڈوڈاگولہ ہلی گاؤں میں واقع ایک معروف کمپنی کے احاطے میں پیش آیا۔ منگل کی رات تقریباً سوا نو بجے ہاؤس کیپنگ کے عملے نے خواتین کے بیت الخلاء میں نکاسی کے نظام میں رکاوٹ محسوس کی۔ شفٹ ختم ہونے کی وجہ سے صفائی کا کام اگلی صبح تک ٹال دیا گیا، لیکن بدھ کی صبح جب عملے نے رکاوٹ دور کرنے کی کوشش کی تو وہاں ایک نومولود بچے کا خون آلود جنین دریافت ہوا، جسے دیکھ کر عملے کے اوسان خطا ہو گئے۔
ابتدائی تحقیقات اور پولیس کو دی گئی شکایت کے مطابق، ملزمہ نے نہ صرف بچے کو بیت الخلاء میں جنم دیا بلکہ انتہائی بے رحمی سے اس کا گلا کاٹ کر اسے وہیں فلش میں بہانے کی کوشش کی۔ کمپنی کے سینئر انجینئر کی مدعیت میں مقدمہ درج کر لیا گیا ہے اور پولیس نے جائے وقوعہ سے شواہد اکٹھے کر لیے ہیں۔
وشوناتھ پورہ پولیس نے جدید تکنیک اور کمپنی کے ریکارڈ کی مدد سے ملزمہ کی شناخت کر لی ہے۔ پولیس کے مطابق، واقعے کے بعد خاتون کی طبعیت بگڑ گئی تھی اور وہ اس وقت ایک نجی ہسپتال میں زیرِ علاج ہے۔ حکام کا کہنا ہے کہ ملزمہ پولیس کی نگرانی میں ہے اور اس کے صحت یاب ہوتے ہی اسے باقاعدہ گرفتار کر کے تفتیش کا دائرہ وسیع کیا جائے گا تاکہ اس سنگدلانہ اقدام کی وجوہات سامنے آ سکیں۔
متعلقہ کمپنی نے ایک مختصر بیان جاری کرتے ہوئے واقعے پر گہرے دکھ کا اظہار کیا ہے اور کہا ہے کہ وہ مقامی انتظامیہ اور پولیس کے ساتھ تحقیقات میں مکمل تعاون کر رہے ہیں۔
اس واقعے نے علاقے میں خوف و ہراس پھیلا دیا ہے اور سماجی حلقوں میں اخلاقی گراوٹ اور انسانی جان کی بے توقیری پر نئی بحث چھیڑ دی ہے۔
