گرمی کے موسم میں ائیر کنڈیشنر (اے سی) زندگی کو آسان بنانے والا اہم ذریعہ بن جاتا ہے لیکن اس کی کارکردگی اور عمر کا انحصار اس کی قسم اور دیکھ بھال پر ہوتا ہے۔
ماہرین کے مطابق مختلف اقسام کے اے سی یونٹس کی مدت کار ایک جیسی نہیں ہوتی۔روایتی ونڈو اے سی یونٹس عموماً 8 سے 10 سال تک چلتے ہیں، جبکہ پورٹیبل اے سی بھی تقریباً اتنی ہی مدت تک کارآمد رہتے ہیں۔ اس کے مقابلے میں جدید وال ماؤنٹڈ یونٹس 10 سے 15 سال تک بہتر کارکردگی دکھا سکتے ہیں۔
ماہرین کا کہنا ہے کہ سنٹرل ایئر کنڈیشننگ یا HVAC سسٹمز سب سے زیادہ دیرپا ہوتے ہیں، جو عام طور پر 15 سے 20 سال تک چل سکتے ہیں۔ یہ سسٹمز بڑے گھروں یا عمارتوں کو ٹھنڈا کرنے کے لیے بنائے جاتے ہیں، اس لیے انہیں زیادہ مضبوط اور پائیدار ڈیزائن کیا جاتا ہے۔
ماہرین کے مطابق اے سی کی کارکردگی اور عمر کا انحصار بڑی حد تک اس کی باقاعدہ دیکھ بھال پر ہوتا ہے۔ کسی بھی برانڈ یا قسم کا اے سی ہو اس کی درست مدت کا تعین مشکل ہوتا ہے کیونکہ استعمال اور مینٹی نینس اس پر براہِ راست اثر انداز ہوتے ہیں۔
ماہرین کا کہنا ہے کہ باقاعدہ مینٹی نینس سے اے سی کی کارکردگی بہتر رہتی ہے اور اس کی عمر میں اضافہ ہوتا ہے جبکہ دیکھ بھال نہ کرنے کی صورت میں یونٹ جلد خراب ہو سکتا ہے۔
گھریلو سطح پر چند آسان اقدامات سے بھی اے سی کو بہتر حالت میں رکھا جا سکتا ہے، جیسے ایئر فلٹرز کو کمپنی کی ہدایات کے مطابق باقاعدگی سے تبدیل کرنا۔ اسی طرح آؤٹ ڈور یونٹ کو گرد، پتوں اور دیگر رکاوٹ بننے والی چیزوں سے صاف رکھنا ضروری ہے تاکہ ہوا کا بہاؤ متاثر نہ ہو۔ صفائی کے بعد یونٹ کا بصری معائنہ بھی کیا جانا چاہیے تاکہ کسی ممکنہ خرابی کو بروقت پہچانا جا سکے۔
ماہرین نے خبردار کیا ہے کہ بعض تکنیکی امور خود کرنے کے بجائے ماہر ٹیکنیشن سے رجوع کرنا چاہیے۔ لائسنس یافتہ HVAC ماہرین کوائلز، فین، موٹر اور ڈرینیج سسٹم جیسے اہم حصوں کی صفائی اور مرمت بہتر طریقے سے انجام دے سکتے ہیں۔
ماہرین کے مطابق اے سی کے اندرونی الیکٹرانک حصوں کے ساتھ خود چھیڑ چھاڑ کرنا خطرناک ثابت ہو سکتا ہے، اس لیے باقاعدہ پروفیشنل چیک اپ نہ صرف کارکردگی کو بہتر بناتا ہے بلکہ ممکنہ حادثات سے بھی بچاتا ہے۔
