کھیلوں کی دنیا میں جب بھی کوئی کھلاڑی شاندار کارکردگی دکھاتا ہے، تو اس کے ذہن میں بڑی رقم، قیمتی ٹرافیاں یا چمکتی دمکتی لگژری گاڑیاں ہی آتی ہیں۔ فٹ بال، کرکٹ اور اولمپکس جیسے عالمی مقابلوں میں ایسا ہونا ایک عام سی بات ہے۔ لیکن افریقہ کے ایک فٹ بالر کو میچ جتوانے پر جو انعام ملا، اس نے سوشل میڈیا پر دلچسپ تبصروں اور مسکراہٹوں کا ایک طوفان کھڑا کر دیا ہے۔
زیمبیا سے تعلق رکھنے والے فٹ بالر کینیڈی موسونڈا کو نہ تو کوئی بڑا چیک ملا اور نہ ہی کوئی مہنگی کار، بلکہ انہیں میچ کا بہترین کھلاڑی (پلیئر آف دی میچ) بننے پر انعام میں انڈوں کے پانچ کریٹس دیے گئے۔
یہ کوئی مذاق یا مداحوں کا غصہ نہیں تھا، بلکہ انہیں یہ انڈے باقاعدہ ایک تحفے کے طور پر پیش کیے گئے تاکہ وہ اپنی پروٹین کی ضرورت کو پورا کر سکیں اور مستقبل میں مزید جاندار کھیل پیش کریں۔ موسونڈا نے میچ میں فیصلہ کن گول کرنے پر دو کریٹس اور میچ کے بہترین کھلاڑی کا اعزاز پانے پر مزید تین کریٹس اپنے نام کیے۔
یہ دلچسپ واقعہ زیمبیا کی سپر لیگ کے دوران پیش آیا، جہاں وہ ‘پاور ڈائناموز’ کی طرف سے کھیلتے ہوئے ‘نکانا’ کے خلاف میچ جیتنے میں کامیاب ہوئے تھے۔
سوشل میڈیا پر وائرل ہونے والی ویڈیو میں دیکھا جا سکتا ہے کہ ایوارڈ دینے والے سپانسر کھلاڑی کی تعریف کرتے ہوئے انہیں انڈوں سے لطف اندوز ہونے کا مشورہ دے رہے ہیں، جبکہ دوسری طرف ان کے ساتھی کھلاڑی اس انوکھے انعام پر ہنستے ہوئے تالیاں بجا کر ان کا حوصلہ بڑھا رہے ہیں۔
عام طور پر ایسے عجیب انعام پر کوئی بھی جھجک محسوس کر سکتا ہے، لیکن موسونڈا نے بالکل برا نہیں منایا۔ انہوں نے ایک خوبصورت مسکراہٹ کے ساتھ اس غیر معمولی تحفے کو قبول کیا اور اپنے ساتھی کھلاڑیوں، کوچز اور کلب انتظامیہ کا شکریہ ادا کیا۔
