پاکستان 23 سال کے طویل وقفے کے بعد ایک بار پھر ساؤتھ ایشین گیمز کی میزبانی کے لیے تیار ہے۔ علاقائی کھیلوں کا یہ بڑا ایونٹ 3 سے 11 اپریل 2027 تک پاکستان کے تین بڑے شہروں اسلام آباد، لاہور اور پشاور میں منعقد ہوگا۔
ساؤتھ ایشین گیمز 2027 میں مجموعی طور پر 28 کھیلوں کے مقابلے ہوں گے، جن میں 346 میڈل ایونٹس شامل ہیں۔ گیمز میں خطے کے مختلف ممالک سے 3,200 سے زائد کھلاڑیوں کی شرکت متوقع ہے۔
پاکستان نے آخری مرتبہ 2004 میں اسلام آباد میں ساؤتھ ایشین گیمز کی میزبانی کی تھی۔ 23 سال بعد دوبارہ میزبانی ملنے کو ملک میں کھیلوں کے فروغ اور بین الاقوامی سطح پر پاکستان کے مثبت تشخص کے لیے اہم پیش رفت قرار دیا جا رہا ہے۔
گیمز کے انعقاد کے لیے تیاریاں تیزی سے جاری ہیں جبکہ وفاقی حکومت کی جانب سے مطلوبہ فنڈز کی منظوری بھی دی جا چکی ہے۔ متعلقہ ادارے مختلف کھیلوں کے مقابلوں، کھلاڑیوں کی رہائش، سیکیورٹی اور دیگر انتظامات کو حتمی شکل دینے میں مصروف ہیں۔
بھارت کی جانب سے اپنے نمائندے کے ذریعے مجوزہ تاریخوں کی حمایت کی گئی ہے، تاہم گیمز میں بھارتی دستے کی شرکت کی باضابطہ تصدیق ابھی نہیں ہوئی۔
ساؤتھ ایشین گیمز کی میزبانی سے پاکستان میں کھیلوں کی سرگرمیوں کو فروغ ملنے، نوجوان کھلاڑیوں کو بین الاقوامی سطح پر اپنی صلاحیتیں منوانے کے مواقع فراہم ہونے اور خطے میں کھیلوں کے روابط مزید مضبوط ہونے کی توقع ہے۔
