پاکستانی پولٹری فارمز سپر بگز کا گڑھ بننے لگے: برطانوی اخبار کی رپورٹ میں انکشاف

اسلام آباد (این این آئی) پاکستانی پولٹری فارمز سپر بگز کا گڑھ بننے لگے۔ برطانوی اخبار فنانشل ٹائمز کی رپورٹ میں خبردار کر دیا گیا۔ برطانوی اخبار فنانشل ٹائمز کی رپورٹ کے مطابق پاکستان میں پولٹری فارمزمیں اینٹی بائیوٹکس کے زیادہ استعمال سے ایسے خطرناک جراثیم پھیلنے کا خدشہ ہے جن پر عام اینٹی بائیوٹکس کا اثرکم یا ختم ہوجاتا ہے۔ 2023 میں دیہی پنجاب میں کیے گئے سروے کے مطابق60 فیصد پولٹری فارمز میں بغیر نسخے کے اینٹی بائیوٹکس استعمال کی گئیں اور تقریبا نصف فارمز میں مرغیوں کی افزائش کیلئے بھی یہ ادویات استعمال کی گئیں بعض کمپنیاں قوانین کے برخلاف مرغیوں کی خوراک میں بھی اینٹی بائیوٹکس شامل کرتی ہیں۔ برطانوی اخبار فنانشل ٹائمز کی رپورٹ میں خبردار کیا گیا کہ اینٹی بائیوٹکس کے بے دریغ استعمال سے مزاحم جراثیم کے زندہ رہنے اور افزائش کے امکانات بڑھ جاتے ہیں۔