ایس ایس پی انویسٹی گیشن کی زیرصدارت تبدیلی تفتیش فرسٹ بورڈ کا انعقاد

لاہور(کر ائم رپو رٹر)انویسٹی گیشن ہیڈکوارٹرز میں ایس ایس پی انویسٹی گیشن محمد نوید کی زیرِ صدارت تبدیلی تفتیش فرسٹ بورڈ کا انعقاد ہوا، جس میں انویسٹی گیشن ونگ کے تمام ڈویژنل ایس پیز نے شرکت کی۔ بورڈ میں امانت میں خیانت، چیک
ڈس آنر، اغوائ، دھوکہ دہی اور چوری سمیت مختلف نوعیت کے 28 مقدمات کی تفتیش تبدیلی کی درخواستوں پر غور کیا گیا۔تبدیلی تفتیش بورڈ میں فریقین کو الگ الگ سنا گیا اور ریکارڈ کا جائزہ لینے کے بعد میرٹ کی بنیاد پر تفتیش تبدیلی سے متعلق احکامات جاری کیے گئے۔ امانت میں خیانت کے مقدمات میں مدعی غلام رسول اور کرن وصی، جبکہ چیک ڈس آنر کے مقدمات میں ماجد حسین اور عقیل عباس تفتیش تبدیلی کے لیے پیش ہوئے۔اسی طرح چوری کے مقدمات میں مدعیہ شاہدہ پروین اور محمد افضل جبکہ اغواء کے مقدمات میں بشیراں بی بی اور قربان علی نے تفتیش تبدیلی کی درخواستیں پیش کیں۔ایس ایس پی انویسٹی گیشن محمد نوید نے ناقص اور کمزور تفتیش کرنے والے متعدد افسران کے خلاف کارروائی کرتے ہوئے شوکاز نوٹسز سمیت مختلف سزائیں بھی عائد کیں۔ ان کا کہنا تھا کہ کمزور تفتیش اور ناقص کارکردگی پر افسران کا کڑا احتساب یقینی بنایا جا رہا ہے۔محمد نوید نے کہا کہ تبدیلی تفتیش بورڈ شہریوں کی شکایات کے فوری ازالے کا موثر پلیٹ فارم ہے، غیر جانبدار تفتیش پر کسی صورت سمجھوتہ برداشت نہیں کیا جائے گا۔ خواتین اور بچوں سے متعلق مقدمات کو ترجیحی بنیادوں پر برق رفتاری سے نمٹایا جا رہا ہے۔ایس ایس پی انویسٹی گیشن نے کہا کہ شہریوں کو انصاف کی فراہمی میں غیر ضروری تاخیر کسی صورت قابل قبول نہیں۔ تفتیشی عمل میں سائنسی بنیادوں اور جدید تقاضوں کو اپنانا ناگزیر ہے جبکہ تفتیشی نظام میں جوابدہی اور انصاف کی بروقت فراہمی ہر صورت یقینی بنائی جا رہی ہے۔انہوں نے افسران کو ہدایت کی کہ شہریوں کو میرٹ پر انصاف کی فراہمی کے عمل کو مزید تیز کیا جائے اور ہر مقدمے کی تفتیش غیر جانبداری، شفافیت اور میرٹ کے تقاضوں کے مطابق مکمل کی جائے۔