جناح ہسپتال لاہور میں بے ضابطگیوں کے خاتمے کیلئے ایم ایس کی کارروائی

لاہور (جنرل رپورٹر) جناح ہسپتال لاہور میں انتظامی معاملات میں بہتری اور مبینہ بے ضابطگیوں کے خاتمے کیلئے میڈیکل سپرنٹنڈنٹ ڈاکٹر ذیشان حیدر نے اہم کارروائی کرتے ہوئے تین ملازمین کو انتظامی بنیادوں پر مختلف ہسپتالوں میں تبدیل کرو دیا۔ کارروائی کو پنجاب حکومت کی کرپشن کے خلاف زیرو ٹالرنس پالیسی پر عملدرآمد کی جانب اہم قدم قرار دیا جا رہا ہے۔ ذرائع کے مطابق ایم ایس ڈاکٹر ذیشان حیدر نے ہسپتال میں مبینہ طور پر اثرو رسوخ رکھنے والے عناصر کے خلاف بلاامتیاز کارروائی کا عندیہ دیا ہے۔ مراسلے کے مطابق جونیئر ٹیکنیشن فارمیسی ٹیکنالوجی غلام اسحاق خان کو جناح ہسپتال سے عزیز بھٹی شہید ہسپتال گجرات، جونیئر ٹیکنیشن پبلک ہیلتھ ٹیکنالوجی رانا محمد داد کو ڈی ایچ کیو ٹیچنگ ہسپتال میانوالی جبکہ سکیورٹی سپروائزر عامر محمود کو بہاول وکٹوریہ ہسپتال بہاولپور تبدیل کر دیا گیا ہے۔ تینوں ملازمین کو فوری طور پر موجودہ ڈیوٹی سے فارغ تصور کیا جائے گا۔ ذرائع کے مطابق غلام اسحاق خان جناح ہسپتال میں پرچیز سے متعلق معاملات دیکھ رہے تھے جبکہ رانا محمد داد چیف سینٹری کے طور پر فرائض انجام دے رہے تھے۔ ان کے بارے میں شکایات تھیں کہ وہ بعض چھوٹے ملازمین کو من پسند جگہوں پر ڈیوٹی لگوانے کے عوض فیس وصول کرتے تھے، تاہم ان الزامات کی آزادانہ تصدیق نہیں ہوسکی۔ ذرائع کا کہنا ہے کہ سکیورٹی سپروائزر عامر محمود کو اس سے قبل بھی 31 جولائی کو سیکرٹریٹ ڈسپوزل پر منتقل کیا گیا تھا تاہم بعدازاں سفارش کے ذریعے دوبارہ جناح ہسپتال میں تعیناتی حاصل کرلی۔ موجودہ کارروائی کے بعد انہیں ایک بار پھر ہسپتال سے باہر منتقل کر دیا گیا ہے۔ ہسپتال ذرائع کے مطابق ایم ایس ڈاکٹر ذیشان حیدر کی جانب سے انتظامی معاملات میں کسی قسم کا دبائو قبول نہ کرنے اور قواعد و ضوابط کے مطابق فیصلے کرنے کے اقدام کو ملازمین میں بھی اہم پیشرفت قرار دیا جا رہا ہے۔ ڈاکٹر ذیشان حیدر کی جانب سے تین ملازمین کے تبادلوں سے یہ پیغام دیا گیا ہے کہ ہسپتال میں انتظامی امور، خریداری، سکیورٹی اور ڈیوٹیوں کے معاملات میں مبینہ اثرو رسوخ اور بے ضابطگیوں کی گنجائش نہیں ہوگی۔