یونیورسٹی آف ویٹرنری اینڈ اینمل سائنسز میں غیرقانونی اخراجات کیے جانیکا انکشاف

لاہور (جنرل رپورٹر) یونیورسٹی آف ویٹرنری اینڈ اینیمل سائنسز لاہورمیں غیر قانونی تقرریوں اورغیرقانونی اخراجات کی مد میں 16 کروڑ 81 لاکھ 70 ہزار خرچ کیے جانے کا انکشاف ہوا ہے۔ پبلک اکائونٹس کمیٹی ون کے 7 اگست کے اجلاس کےمیٹنگ منٹس میں یونیورسٹی میں ہونے والی مالی بے ضابطگیوں کی نشاندہی کی گئی۔ دستاویزات کے مطابق یونیورسٹی میں 7 کروڑ 50 لاکھ 58 ہزار 403 روپے کی غیرقانونی تقرریوں کا کیس آڈٹ اعتراض کی زد میں ہے۔ پی اے سی ون کی ہدایات کے باوجود کیس میں مطلوبہ رپورٹ اور ریکارڈ کی تصدیق تاحال زیر التواء ہے۔ اسی طرح یونیورسٹی میں 8 کروڑ 99 لاکھ 4 ہزار 500 روپے کی غیر قانونی تقرریوں کا ایک اور کیس بھی سامنے آیا ہے، 32 لاکھ 5 ہزار 884 روپے کی غیرقانونی تقرریوں پر بھی آڈٹ اعتراض اٹھایا گیا ہے۔ پی اے سی ون کی کارروائی کے دوران غیرقانونی تقرریوں کے معاملات میں ذمہ دار افسران کے خلاف پیڈا ایکٹ 2006 ء کے تحت کارروائی کرنے کا فیصلہ کیا گیا۔ محکمہ کی جانب سے بتایا گیا کہ کیسز میں کارروائی میں تاخیر کی ایک وجہ مستقل وائس چانسلر کی عدم موجودگی ہے۔ آڈٹ میں یونیورسٹی میں زیر التواء واجبات کی مد میں بھی غیر قانونی اخراجات کی نشاندہی کی گئی۔