کراچی (این این آئی) وزیراعلیٰ سندھ سید مراد علی شاہ نے کہا ہے کہ پولیو کے خلاف جنگ سیاست سے بالاتر قومی ذمہ داری ہے، حکومت کی اولین ترجیح ہر بچے تک ویکسین کی رسائی یقینی بنانا ہے، دنیا پولیو کے مکمل خاتمے کے پہلے سے کہیں زیادہ قریب پہنچ چکی ہے تاہم وائرس کی موجودگی کے باعث مسلسل چوکسی اور مؤثر ویکسینیشن ناگزیر ہے۔انسداد پولیو مہم کی افتتاحی تقریب سے خطاب اور میڈیا سے گفتگو کرتے ہوئے وزیراعلیٰ سندھ نے کہا کہ سندھ حکومت گیٹس فاؤنڈیشن، یونیسیف، روٹری اور دیگر شراکت دار اداروں کے تعاون سے پولیو کے خاتمے کے لیے مسلسل کام کر رہی ہے۔ ان کا کہنا تھا کہ وہ انسداد پولیو مہم کا خود افتتاح اس لیے کرتے ہیں تاکہ اس اہم قومی مقصد کے لیے حکومتی عزم واضح رہے۔سید مراد علی شاہ نے کہا کہ پاکستان اور افغانستان دنیا کے وہ دو ممالک ہیں جہاں پولیو وائرس اب بھی موجود ہے۔پاکستان میں رواں سال اب تک 4 پولیو کیسز رپورٹ ہوئے ہیں، جن میں ایک سندھ کے ضلع سجاول اور 3 خیبرپختونخوا سے سامنے آئے ہیں۔انہوں نے بتایا کہ سندھ میں 21 سے 27 ستمبر تک سات روزہ انسداد پولیو مہم جاری رہے گی، جس کے دوران ایک کروڑ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ مہم صوبے کے تمام 30 اضلاع میں چلائی جائے گی، 23 اضلاع میں مکمل جبکہ 7 اضلاع میں جزوی کوریج فراہم کی جائے گی۔
