مخبروں کے نام اربوں روپے والے کلکٹرز کی شامت تفصیلات طلب 

ملتان (عمران خان سے) اربوں روپے انفارمر کے نام پر لینے والے کلکٹرز کی شامت آگئی۔ قائمہ کمیٹی برائے خزانہ کی ہدایت پر فیڈرل بورڈ آف ریونیو نے تمام چیف کلکٹرز اور کلکٹرز سے تفصیلات مانگ لیں۔ تفصیل کے مطابق حساس اداروں نے قائمہ کمیٹی برائے خزانہ کو ایک رپورٹ دی جس کے مطابق موجودہ چیئرمین ایف بی آر کی دور تعیناتی کے دوران درجنوں چیف کلکٹرز اور کلکٹرز نے انفارمر کے نام پر اربوں روپے ریوارڈ منی وصول کی۔ ان لوگوں نے اس سامان کی بھی ریوارڈ منی وصول کی جو سامان حساس اداروں نے پکڑ کر دیا۔ ان کا طریقہ واردات یہ تھا کہ کسٹم ٹیمیں جو بھی سامان پکڑتی تھیں اس میں انفارمر کے طور پر متعلقہ کلکٹریٹس کا کلکٹر اپنے آپ کو انفارمر درج کروا دیتا ہے اور جو سامان ایک کروڑ کا ہوتا تھا اسے دس کروڑ کا ظاہر کیا جاتا تھا تاکہ ریوارڈ منی زیادہ سے زیادہ وصول کی جاسکے۔ اس رپورٹ کے مطابق 10 سے زائد کلکٹرز ایسے ہیں جنہوں نے جعلی انفارمر بن کر پچیس پچیس کروڑ سے زائد ریوارڈ کے نام پر وصول کی اور بعد میں یہی پکڑا گیا سامان مارکیٹ میں بیچ کر گوداموں کو آگ لگادی۔ ذرائع کے مطابق اس بات کی نشاندہی موجودہ چیف کلکٹرز انفورسمنٹ جمیل ناصر نے حساس اداروں کو کی۔ قائمہ کمیٹی تک جب یہ رپورٹ پہنچی تو انہوں نے چیئرمین ایف بی آر سے اس کی رپورٹ طلب کی جس پر چیئرمین ایف بی آر نے بورڈ کے ذریعے چیف کلکٹر کمشنر ایریزمنٹ ساؤتھ کراچی، ڈائریکٹر جنرل آئی اینڈ آر ایم، چیف کلکٹر ایریزمنٹ نارتھ پشاور، چیف کلکٹر انفورسمنٹ اسلام آباد، چیف کلکٹر ایریزمنٹ پنجاب لاہور، چیف کلکٹر آف کسٹم ایریزمنٹ بلوچستان سے پچھلے 2 سال کی رپورٹ طلب کرلی ہے جس میں ان سے پوچھا گیا ہے کہ ہر کلکٹریٹ میں کتنے کیسزز درج ہوئے، کتنے انفارمر کو کوڈ دیئے گئے اور ان پر کتنے کیسزز درج ہوئے، انفارمر کو کتنی مالیت کے پاکستانی روپے میں ایوارڈ دیئے گئے۔ کتنے کسٹم آفیسرز نے انفارمر کے نام پر ایوارڈ وصول کئے۔ رپورٹ کے مطابق ان دس کلکٹرز کی رپورٹ بھی مانگی گئی ہے جنہوں نے 20 کروڑ سے ایوارڈ منی حاصل کی۔ ذرائع کے مطابق اربوں روپے کی اس لوٹ مار کی وجہ سے آئندہ چند ماہ میں بل پیش کیا جائے گا کہ آج کے بعد کسٹم آفیسرز انفارمر کے نام پر اربوں روپے کی لوٹ مار نہیں کرے گا کیونکہ ان کا کام ہی سمگلڈ سامان کوپکڑنا ہے نہ کہ جعلی انفارمر کے نام پر لوٹ مار کرنا۔ عوامی و سماجی حلقوں نے وزیراعظم پاکستان سے مطالبہ کیا کہ جن کسٹم افسران نے انفارمر کے نام اربوں روپے کی لوٹ مار کی ہے ان کے خلاف سخت ایکشن لیا جائے۔
تفصیلات طلب