لاہور (خبریں ڈیجیٹل) شمالی شام کے شہر حلب کے قریب شامی فوج کے ایک مرکز پر پیر کی صبح متعدد شدید دھماکے ہوئے، جن کے نتیجے میں کم از کم 4 افراد زخمی ہوگئے۔ دھماکے
العیص (Al-Eis) کے علاقے میں قائم ایک فوجی تنصیب کے قریب ہوئے۔ دھماکوں کی وجہ فوری طور پر معلوم نہیں ہوسکی۔ بعد ازاں وزارتِ ایمرجنسی و ڈیزاسٹر مینجمنٹ نے بتایا کہ ایک شہری گولہ بارود کے ڈپو میں ہونے والے دھماکے کے نتیجے میں شیل کے ٹکڑے لگنے سے زخمی ہوا، جبکہ دو افراد کو عارضی طور پر سانس لینے میں دشواری ہوئی۔ ایک اور شخص دھماکے کے بعد فرار ہونے کی کوشش میں ٹریفک حادثے کا شکار ہوا۔دھماکوں کا سلسلہ ابتدائی دھماکے کے بعد بھی جاری رہا، جس کے باعث امدادی ٹیموں کو جائے وقوعہ تک پہنچنے میں مشکلات کا سامنا کرنا پڑا۔ سول ڈیفنس اہلکاروں نے زخمیوں کو منتقل کرنے کے ساتھ ساتھ قریب موجود تین خاندانوں کو محفوظ مقام پر منتقل کیا۔حلب کے گورنر عزام الغریب نے شہریوں سے کہا کہ وہ فی الحال اپنے گھروں سے باہر نہ نکلیں، جبکہ اسپتالوں، ایمبولینس سروسز اور ہنگامی ٹیموں کو الرٹ کردیا گیا۔ سکیورٹی حکام نے شہریوں کی حفاظت کے لیے دھماکوں والی جگہ کی جانب جانے والی سڑکیں بھی بند کردیں۔ایک مقامی رہائشی نے خبر رساں ادارے اے ایف پی کو بتایا کہ اس نے ایک زوردار دھماکے کی آواز سنی اور عمارت کی چھت سے دور بڑے شعلے بھی دیکھے۔
